Koerde

Die Koerde (Koerdies: کورد, Kurd) is 'n Irannese etniese groep inheems aan Irak, Iran, Sirië en Turkye en hulle praat Koerdies, 'n Irannese taal asook Gorani en Zazaki. Koerde leef hoofsaaklik in die streek van Koerdistan wat oor die noorde van Irak, die noordweste van Iran, die noordooste van Sirië en die suidooste van Turkye strek.[50]

Vlag van Koerdistan en die Koerde

Verspreiding van Koerde in die Midde-Ooste volgens die CIA in 1986

Hierdie artikel handel oor die etniese groep. Vir die taal, sien Koerdies.

Koerde
Totale bevolking:	ca. 30–32 miljoen[1][2]
Belangrike bevolkings  in:	Turkye 12–16 miljoen[1][3][4][5]  Irak 4–6,5 miljoen[6][1][4][7][8]  Iran 3,35–8 miljoen[9][10][1][4]  Sirië 1,3–2,5 miljoen[11][12][13][14][4][15][16][17][18][19]  Duitsland 800 000[20]  Israel 100 000–200 000[21][22][23]  Frankryk 150 000[24]  Swede 83 600[25]  België 80 000[26]  Nederland 70 000[27]  Rusland 63 800[28]  Verenigde Koninkryk 50 000[29][30][31]  Kasakstan 42 300[32]  Armenië 37 500[33]  Switserland 35 000[34]  Denemarke 30 000[35]  Jordanië 30 000[36]  Oostenryk 23 000[37]  Griekeland 22 000[38]  Georgië 20 800[39]  Verenigde State 15 400[40]  Kirgisië 13 200[41][42]  Kanada 11 685[43]  Finland 10 700[44]  Australië 7 000[45]  Azerbeidjan 6 100[46]
Taal:	Koerdies en Zaza-Gorani-tale
Geloofsoortuiging:	Hoofsaaklik Soennitiese Islam, maar ook Sjiïtiese Islam en Soefisme; Minderhede van Deïsme, Agnostisisme, Jesiede, Zoroastrisme, Christendom en Judaïsme
Verwante etniese groepe:	Ander Irannese volke soos Beloetsje, Hasara, Jesiede, Ossetiërs, Pasjtoene, Perse en Tadjiks[47][48][49]

Wêreldwyd leef tussen 30 en 32 miljoen Koerde, waarvan tussen 12 en 16 miljoen in Turkye (15–25% van die bevolking), 4 tot 6,5 miljoen in Irak (15–23%), 3,35 tot 8 miljoen in Iran (5–10%) en 1,3 tot 2,5 miljoen in Sirië (6–15%). Hulle vorm die belangrikste etniese minderheid in drie van die vier lande; in Iran vorm Koerde die tweede belangrikste etniese minderheid naas die Azerbeidjanners. Daarbenewens vorm Koerde inheemse minderhede in die drie lande van die Kaukasus: Armenië, Azerbeidjan en Georgië. Behalwe die Turkse suidooste leef belangrike groepe van Koerde nog in groot stede soos Ankara en Istanboel, waar hulle naas Turke die belangrikste bevolkingsgroep vorm.

Die meeste Koerde is aanhangers van die Soennitiese Islam met minderhede van Sjiïsme en Soefisme. Jesiede vorm 'n eie etnies-godsdienstige groep wat soms as Koerde beskou word met hul eie geloof.

As gevolg van politiese konflikte in die Midde-Ooste het 'n Koerdiese diaspora van sowat 2 miljoen in lande van Wes-Europa soos Duitsland, Noord-Amerika en Oseanië gevestig. Koerdiese nasionaliste maak sedert die einde van die Eerste Wêreldoorlog en die ondergang van die Ottomaanse Ryk aanspraak op 'n eie Koerdiese staat in Koerdistan.