Kepler-186f

Kepler-186f is ’n eksoplaneet wat om die rooidwergster Kepler-186 wentel.[1][2][3] Dit is sowat 500 ligjare van die Aarde af[4] en is die eerste eksoplaneet met ’n radius min of meer dié van die Aarde wat in die bewoonbare sone van ’n ander ster gevind is. Nasa se Kepler-ruimteteleskoop het dit bespeur met die oorgangsmetode, saam met vier ander planete wat nader aan die ster voorkom – hulle is almal effens groter as die Aarde.[5] Dit is op 17 April 2014 aangekondig[5] en daarna in die tydskrif Science gepubliseer.[4]

Kepler-186f
Eksoplaneet
Die grootte van Kepler-186f in vergelyking met dié van die Aarde.
Die grootte van Kepler-186f in vergelyking met dié van die Aarde.
Soort planeetSuperaarde
MoedersterKepler-186
Ster se eienskappe
SterrebeeldSwaan
Regte klimming19h 54m 36.651s
Deklinasie+43° 57′ 18.06″
Skynmagnitude (m)14,625
Afstand (ligjaar)492
Metaalinhoud-0,28
SpektraaltipeM1V
Planeet
Radius1,11 R⊕
Wentelperiode129,946 dae
Ontdekking
Datum17 April 2014
OntdekkersKepler-ruimteteleskoop
MetodeOorgang
StatusGepubliseer
Portaal  Portaalicoon   Sterrekunde

Kepler-186f wentel elke 129,9 dae om ’n ster met sowat 4% van die Son se ligsterkte. Dit kom voor aan die buitenste rand van die bewoonbare sone, soortgelyk aan die posisie van Mars in die Sonnestelsel.[4] Die enigste fisiese eienskap wat direk afgelei kan word van die waarnemings, is die radius van 1,11 keer dié van die Aarde.[2][5] Dit is dus sowat 11% groter. Dit beteken die totale oppervlakte van Kepler-186f is sowat 23% groter en die volume sowat 37% groter as die aarde s'n.

Bewoonbaarheid
’n Kunstenaar se voorstelling van ’n aardgrootte-eksoplaneet in die bewoonbare sone van sy moederster. Dit stem min of meer ooreen met Kepler-186f se bekende data (Nasa/SETI/JPL).

Kepler-186f se ligging in sy ster se bewoonbare sone beteken nie noodwendig dat dit bewoonbaar is nie; dít hang ook af van sy atmosferiese eienskappe, wat onbekend is.[6] Die planeet is te ver om sy atmosfeer te bestudeer met bestaande teleskope, insluitende die James Webb-ruimteteleskoop.[2][7] ’n Eenvoudige klimaatmodel – waarin die planeet se moontlike vlugtige stowwe beperk is tot stikstof, koolstofdioksied en water, sonder inagneming van wolke – dui daarop dat sy oppervlaktemperatuur bo 273 K (0 °C) kan wees.[8]

Die ster se vier ander planete wat tot dusver ontdek is (b, c, d en e, volgens toenemende afstand van die ster af) is te naby aan die ster en dus te warm om vloeibare water te hê. Hulle het waarskynlik ’n sinchroniese rotasie, maar Kepler-186f is in ’n wyer wentelbaan, waar die ster se getykragte baie swakker is. Vanweë die stadige evolusie van rooidwerge is die Kepler-186-stelsel se ouderdom nie bekend nie, maar dit is waarskynlik ’n paar miljard jaar:[8] volgens onlangse studies sowat 4 miljard jaar.[9] Die kans dat dit ’n sinchroniese rotasie kan hê is sowat 50%.

Volgens ’n artikel van 2015 is Kepler-186f, Kepler-442b en Kepler-62f die waarskynlikste planete om lewe te huisves.[10] Studies in Junie 2018 het daarop gedui dat Kepler-186f dalk seisoene en ’n klimaat soortgelyk aan die Aarde s’n kan hê.[11][12]

Sien ook

Verwysings
  1. Chang, Kenneth (17 April 2014). "Scientists Find an 'Earth Twin', or Maybe a Cousin". New York Times (in Engels). Geargiveer vanaf die oorspronklike op 9 Oktober 2019.
  2. Chang, Alicia (17 April 2014). "Astronomers spot most Earth-like planet yet" (in Engels). Associated Press. Geargiveer vanaf die oorspronklike op 15 Maart 2019. Besoek op 25 September 2014.
  3. Morelle, Rebecca (17 April 2014). "'Most Earth-like planet yet' spotted by Kepler". BBC News (in Engels). Geargiveer vanaf die oorspronklike op 4 Oktober 2019.
  4. "Science, gratis weergawe" (PDF). Geargiveer (PDF) vanaf die oorspronklike op 18 April 2014.
  5. Johnson, Michele; Harrington, J.D. (17 April 2014). "NASA's Kepler Discovers First Earth-Size Planet In The 'Habitable Zone' of Another Star" (in Engels). Nasa. Geargiveer vanaf die oorspronklike op 8 Mei 2020.
  6. Clark, Stephen (17 April 2014). "Earth's 'cousin' planet lies 500 light-years away". Spaceflight Now (in Engels). Geargiveer vanaf die oorspronklike op 4 Augustus 2018.
  7. Greenfieldboyce, Nell (17 April 2014). "Scientists Spot A Planet That Looks Like 'Earth's Cousin'" (in Engels). National Public Radio. Geargiveer vanaf die oorspronklike op 1 Mei 2015. Besoek op 19 Desember 2019.
  8. Bolmont, Emeline; Raymond, Sean N.; von Paris, Philip; Selsis, Franck; Hersant, Franck; Quintana, Elisa V.; Barclay, Thomas (27 Augustus 2014). "Formation, tidal evolution and habitability of the Kepler-186 system". The Astrophysical Journal. 793 (1): 3. arXiv:1404.4368. Bibcode:2014ApJ...793....3B. doi:10.1088/0004-637X/793/1/3.
  9. "Kepler-186 f". NASA Exoplanet Archive. Besoek op 19 Julie 2016.
  10. Paul Gilster, Andrew LePage (30 Januarie 2015). "A Review of the Best Habitable Planet Candidates" (in Engels). Centauri Dreams, Tau Zero Foundation. Geargiveer vanaf die oorspronklike op 19 Junie 2017. Besoek op 24 Julie 2015.
  11. Mack, Eric (29 Junie 2018). "Two Earth-like exoplanets (Kepler 186f and Kepler 62f) now even better spots to look for life – Two of the earliest Earth-ish exoplanet finds are now more exciting targets in the search for habitable worlds beyond this rock". CNET (in Engels). Geargiveer vanaf die oorspronklike op 19 Desember 2019. Besoek op 29 Junie 2018.
  12. Shan, Yutong; Li, Gongjie (16 Mei 2018). "Obliquity Variations of Habitable Zone Planets Kepler-62f and Kepler-186f". The Astronomical Journal. 155 (6): 237. arXiv:1710.07303. doi:10.3847/1538-3881/aabfd1. ISSN 1538-3881.

Eksterne skakels
This article is issued from Wikipedia. The text is licensed under Creative Commons - Attribution - Sharealike. Additional terms may apply for the media files.