Keith Richards

Keith Richards (gebore 18 Desember 1943) is 'n Engelse musikant, liedjieskrywer, sanger en musiekvervaardiger. Hy is 'n oorspronklike lid van The Rolling Stones as 'n kitaarspeler, sanger en medehoofliedjieskrywer. Sy liedjieskryfvennootskap met die groep se hoofsanger, Mick Jagger, is een van die suksesvolstes in die geskiedenis. Sy loopbaan strek oor ses dekades en sy kitaarspeelstyl is deur hulle hele bestaan 'n kenmerk van die Rolling Stones.

Keith Richards in 2012.

Richards het soms die nuus gehaal met sy romantiese verbintenisse en onwettige dwelmmisbruik, en hy is dikwels uitgebeeld as 'n teenkulturele figuur. Hy was aanvanklik as Keith Richard bekend, maar het in die 1970's sy volle van begin gebruik.

Lewe

Richards is in Dartford, Kent, gebore en het daar grootgeword. Hy het met Jagger, Bill Wyman, Charlie Watts, Ian Stewart en Brian Jones bevriend geraak en by die Rolling Stones aangesluit. Hy is soms die hoofsanger, gewoonlik van minstens een liedjies op 'n konsert. Benewens sy loopbaan met die Stones het hy ook musiek gemaak saam met sy eie groep, The X-Pensive Winos. Verder verskyn hy in 'n paar Pirates of the Caribbean-rolprente as kaptein Teague, die vader van Jack Sparrow, wie se voorkoms en karakterisering op Richards self geskoei is.

In 1989 is Richards in die Rock and Roll Hall of Fame en in 2004 in die UK Music Hall of Fame opgeneem saam met die ander lede van die Stones. Die tydskrif Rolling Stone noem hom in 2011 vierde op hulle lys van 100 beste kitaarspelers. In 2023 was hy 15de op Rolling Stone se lys.[1]

Verwysings
  1. "The 250 Greatest Guitarists of All Time". Rolling Stone (in Engels (VSA)). 13 Oktober 2023. Besoek op 14 Oktober 2023.

Skakels
This article is issued from Wikipedia. The text is licensed under Creative Commons - Attribution - Sharealike. Additional terms may apply for the media files.