Karoo- Nasionale Park
Die Karoo- Nasionale Park is naby die dorp Beaufort-Wes in die Wes-Kaap Provinsie geleë. Dié park is in 1979 gestig met die doel om 'n gedeelte van die Karoo te bewaar. Die park is bekend vir verskeie fauna en flora, insluitend die witkruisarend en verskillende soorte skilpaaie. Verskeie soogdierspesies word in die park aangetref.
| Karoo- Nasionale Park | |
|---|---|
 | |
| Land | Suid-Afrika |
| Provinsie | Wes-Kaap |
| Naaste dorp | Beaufort-Wes |
  Karoo- Nasionale Park |
|
| Koördinate: 31°21′0″S 22°35′0″O | |
| Oppervlak | 768 km2 |
| Openingsjaar | 1979 |
| Bestuursliggaam | SANParke |
| Webblad | Karoo- Nasionale Park |
Die Karoo- Nasionale Park is ook bekend vir die Kwaggaprojek wat deur Reinhold Rau bestuur word. Daar word gepoog om die uitgestorwe kwagga weer te laat "herleef" deur bontkwaggas wat 'n genetiese afwyking het en baie na die kwagga lyk hier te vestig. Sodoende word 'n teelprojek aan die gang gehou (in die tweede geslag) en Rau reken dat die vierde geslag bontkwaggas baie soos die kwagga sal lyk.
Talle wildsoorte, waarvan die Kaapse bergkwagga die belangrikste is, is in hierdie gebied hervestig. Omdat ongeveer 40 % van Suid-Afrika se grondgebied woestyn- of halfwoestynagtig is en die flora en fauna wat daarin voorkom, ʼn belangrike deel van Suid-Afrika as geheel se flora en fauna verteenwoordig, is daar besluit om 'n park in die Karoo te vestig waar die gebied se natuurlike plante- en dierelewe beskerm kan word.
Totstandkoming
Planne vir die daarstelling van so ʼn nasionale park het reeds in 1972 begin vorm aanneem en in September 1976 is die stigting van die park noord van Beaufort-Wes in die Nuweveldbergreeks aangekondig. Die munisipaliteit van Beaufort-Wes het reeds in 1973 sowat 7 000 ha van die dorpsmeent aan die projek afgestaan en die S.A. Natuurstigting het met behulp van fondsinsameling en in oorleg met die Staat die plaas Stolshoek van 7 000 ha gekoop. Nog 'n paar plase is mettertyd opgekoop en op 12 September 1979 is die park amptelik geopen deur die Eerste Minister, mnr. P.W. Botha.
Die park beslaan 'n gebied van altesame 18 000 ha en word deur die Nasionale Parkeraad beheer. Die klimaat is soos elders in die Karoo: warm somers en sonnige wintersdae met koue nagte. Daar val gemiddeld 300 mm reën per jaar. Die plantegroei is eie aan die Karoo en bestaan uit Karoobossies, dwergstruike, bolplante, eenjarige grasse en talle meerjarige plante.
Plante- en dierelewe
Op die vlaktes groei veral die soetdoring (Vachellia karroo), die skilpadbas (Zygaphylfum-spp) en verskillende soorte vygies. Op die laagliggende rante groei veral blinktaaibos (Searsia lucida) en die besemkaree (Searsia erosa). Die aalwyn, Aloe broomii, en die helderkleurige namakwagousblom is van die mooiste blomme wat hier voorkom.
Daar is reeds heel party boksoorte in die park hervestig, waaronder duikers, rooiribbokke, steenbokke, springbokke en swartwildebeeste. Die hervestiging van die skaars Kaapse bergkwagga was die belangrikste projek wat tot dusver aangepak is. Ander diere wat hier gesien kan word, sluit in volstruise en bobbejane. Daar is ongeveer 45 klein en groot soogdierspesies.
In die park voorsien die Springbokvoetslaanpad in die behoeftes van die natuurliefhebber wat die park te voet wil verken. Die staptog duur drie dae en daar is oornaghutte langs die roete.
Bron
- Wêreldspektrum, 1982, ISBN 0908409559 band
- Stuart, Chris & Mathilde (2012). National Parks and Nature Reserves. Struik Travel and Heritage. ISBN 978-1-77007-742-3.