Kalabrië

Satellietbeeld van Kalabrië

Die landstreek is 'n lang en nou skiereiland met 'n noord-suid lengte van 248 km. en 'n maksimum breedte van 110 km. 42% van die oppervlakte is bergagtig en die gebied word omring deur die Tirreense en Ioniese See. Dit word geskei van Sisilië deur die Straat van Messina wat sy nouste tussen Capo Peloro in Sisilië en Punta Pezzo in Kalabrië slegs 3,2 km breed is.

Aan die kus is die klimaat Mediterreens met 'n gemiddelde minimum temperatuur van 8 grade C in die winter en 'n gemiddelde maksimum van 30 grade C in die somer. In die binneland heers 'n bergklimaat met koue winters en droë somers met enkele donderbuie.

Magna Grecia in 280 v. Chr.

Die eerste inwoners van Kalabrië was Oskaanse stamme. Een van die stamme was die Itali. Toe die Grieke met hulle in kontak gekom het, is die hele Kalabrië "Italië" genoem.[2][3][4][5][6] Grieke het al langs die kus kom woon en stede soos Reggio, Sybaris en Kroton gestig. Die bekende wiskundige Pythagoras het in Kroton gewoon. Die Grieke het die gebied "Magna Graecia" genoem in die 6de en 5de eeu voor Christus.

Die Romeinse Ryk verower die gebied in die 3de eeu voor Chr. en noem dit "Regio III Lucania en Brutti". In 918 verower die Arabiere Reggio, hernoem die stad na Riva en verkoop die meerderheid van die bevolking as slawe.[7]

In 1060 het die Normandiërs onder leiding van Roger Guiscard, 'n broer van Robert Guiscard, 'n regering volgens Bisantynse model gevestig. In 1098 word Roger deur Pous Urbanus II aangestel as pouslike legaat en stig later die koninkryk van Sisilië. Teen die einde van die Middeleeue het groot dele van Kalabrië steeds Grieks gepraat.[8] In die 15de en 16de eeu is Grieks vinnig vervang deur Italiaans, die heersende taal van die Italiaanse unifikasie.[9]

Vanaf die bewind van die Huis van Valois-Anjou is Kalabrië regeer vanuit Napels. Kalabrië het 'n reeks van boere-opstande ondervind rond 1848, maar is uiteindelik met Italië verenig onder Garibaldi.

Olyfboomplantasie

Kalabrië is hoofsaaklik 'n landbou streek. Veral olywe word grootskaals gekweek.[10] Die Bergamo lemoen word veral gekweek vir sy essens.[11] 7.2% van die BNP kom van die industrie vernaamlik voedsel, drank en tabak. Meer onlangs is petrochemiese industrie gevestig in Crotone. Kalabrië is een van die armste gebiede van Italië. Die ekonomie word gekniehalter deur korrupsie en georganiseerde misdaad beheer deur die mafia.[12]