Julius Meinl

Julius Meinl International (Duits: Julius Meinl AG, Meinl-Gruppe), dikwels kort Julius Meinl genoem, is 'n Oostenrykse vervaardiger van koffie, fynproewerkos en ander voedsel wat sy hoofkwartier in die hoofstad Wene het. Behalwe vir sy vlagskipwinkel in die Weense middestad het die onderneming, wat na sy stigters Julius Meinl I en Julius Meinl II vernoem is, sy kleinhandelbelange in 1998/99 onder meer aan die Duitse Rewe-groep verkoop.[1]

Julius Meinl AG
Tipe	Oostenrykse aandelemaatskappy (AG)
Gestig	1862
Hoofkantoor	Wene, Oostenryk
Sleutelpersone	Julius Meinl I en Julius Meinl II (stigters); Julius Meinl V (huidige bestuurder)
Gebied bedien	Wêreldwyd
Industrie	Koffie- en voedselbedryf, kleinhandel
Produkte	Koffie, kakao, tee, fynproewerkos
Dogter- maatskappye	Meinlbank
Webwerf	meinlcoffee.com

Julius Meinl se vlagskipwinkel in Graben, 'n straat in die middestad van Wene (1^ste distrik), is die enigste wat nog deur die onderneming besit en bestuur word

Die onderneming het sy oorsprong in 'n koffiewinkel wat deur Julius Meinl I in 1862 in die 1ste Weense Distrik gestig is. Aanvanklik is hier net groen koffiebone verkoop, later ook vars geroosterde koffiebone. Die onderneming se kenteken – 'n swart kinderhoof met 'n hoë rooi fes-hoed teen 'n geel agtergrond – is oorspronklik deur die grafikus Joseph Binder ontwerp. In 2004 is dit deur 'n hersiene weergawe vervang wat deur die Italiaanse ster-ontwerper Matteo Thun geskep is.

In 1877 het Julius Meinl II 'n omwenteling in die koffiebedryf teweeggebring deur sy eie roostermetode te ontwikkel waarby koffiebone nie meer regstreeks aan verhittingsgasse blootgestel is nie wat die koffie 'n onaangename bysmaak gegee het. Sy onderneming het vervolgens tot die leidende koffierooster in Oostenryk-Hongarye asook die grootste invoerder van tee en koffie op dié mark met vyftig miljoen verbruikers gegroei.[2]