Julia, Prinses van Battenberg

Julia Hauke
	Prinses van Battenberg
	; Julia Hauke, deur Woldemar Hau.
Eggenoot	Prins Alexander van Hesse en by Ryn
Vader	Graaf Johann Moritz von Hauke
Moeder	Sophie Lafontaine
Volle naam	Julia Therese Salomea von Hauke
Gebore	24 November 1825 ; Warskou, Pole
Oorlede	19 September 1895 (op 69) ; Schloss Heiligenberg, Jugenheim, Hesse

Julia, Prinses van Battenberg (voorheen gravin Julia Therese Salomea von Hauke; 24 November [O.S. 12 November] 1825 – 19 September 1895) was die vrou van prins Alexander van Hesse en by Ryn, die derde oudste seun van Lodewyk II, Groothertog van Hesse. Haar pa was ’n Poolse generaal van Duitse afkoms. Sy was ’n hofdame van Marie van Hesse, vrou van die toekomstige keiser Aleksander II van Rusland en ’n suster van prins Alexander van Hesse. Julia is later met laasgenoemde getroud.

Die wapen van Battenberg, soos toegeken aan gravin Julia Hauke deur die Groothertog van Hesse.

Die huwelik tussen die twee was morganaties (sosiaal ongelyk) omdat sy nie van prinslike afkoms was nie. Groothertog Lodewyk III van Hesse, Alexander se broer, het egter vir haar ’n adellike titel, Prinses van Battenberg, gegee.

Julia was die ma van Alexander, Prins van Bulgarye, en is ’n voorouer van Charles, Prins van Wallis, eerste aanspraakmaker op die Britse troon, en van die huidige geslag van die Spaanse koningshuis.

Die van Mountbatten

Julia se oudste seun, Lodewyk (Louis) van Battenberg, het ’n Britse onderdaan geword en tydens die Eerste Wêreldoorlog sy van na Mountbatten verengels weens anti-Duitse sentimente in Brittanje. Sy broerskinders, die seuns van prins Hendrik van Battenberg, het dieselfde gedoen. Die lede van dié tak van die familie het ook afstand van hulle Duitse titels gedoen. Hulle het daarna lordskappe van hulle aangetroude neef George V van die Verenigde Koninkryk gekry: Prins Louis het die 1ste Markies van Milford Haven geword en prins Alexander, oudste seun van prins Hendrik, die eerste Markies van Carisbrooke.

Skakels

Hierdie artikel is in sy geheel of gedeeltelik uit die Engelse Wikipedia vertaal.

This article is issued from Wikipedia. The text is licensed under Creative Commons - Attribution - Sharealike. Additional terms may apply for the media files.