Joseph Barry

Joseph Barry (Hitchin, Hertfordshire, 1 April 1796 – Kaapstad, 26 Maart 1865) was 'n Suid-Afrikaanse handelaar, skeepseienaar, boer en parlementslid.

Barry het na die Kaap gekom as verteenwoordiger van 'n Londense wynhandelaar nadat hy die wynbedryf bestudeer het in Frankryk en Spanje. Die onderneming het misluk en hy is terug Engeland toe, maar vroeg in 1819 het hy hom weer aan die Kaap kom vestig. Sy kennismaking met Dirk Gysbert van Reenen, 'n welgestelde boer met wie se kleindogter hy getrou het, het Barry bekendgestel aan die Overberg, 'n streek waarvan hy lewenslank die ongekroonde koning sou word.

Sy vernaamste sakebelange het gewentel om die goedere wat hy met sy eie vragbote na en van Port Beaufort aan die mond van die Breederivier vervoer het. Benjamin Moodie het dit reeds van 1817 af in vennootskap met Kaapse handelaars gedoen, maar Barry het 'n gereelde kontantmark in die Overberg geskep deur produkte ter plaatse te verkoop, pleks dat dit Kaap toe gestuur is om daar namens die produsent verkoop te word. Dit het gou produksie in die Suid-Kaap en die Klein-Karoo aangewakker en 'n verbintenis tussen die inwoners van dié reuse-gebied, en Barry en sy broerskinders Thomas en John geskep wie se handelsfirma van 1834 af as Barry and Nephews bekendgestaan het.

Intussen het Barry in 1827 'n tydelike terugslag beleef toe hy sy boedel moes afstaan weens 'n reeks skipbreuke, maar hy het gou weer op die been gekom deur harde werk en in verskeie hoedanighede, van wetsagent tot poskontrakteur en bouer.

Barry and Nephews, wie se hoofkantoor op Swellendam gesetel was, het sakehuise op dorpe dwarsdeur die uitgestrekte Overberg opgerig, tot sover as Mosselbaai. Die firma het selfs sy eie banknote uitgereik wat vrylik aanvaar is in dié deel van die land, en het 'n kantoor in sowel Kaapstad as Londen gehad.

Barry was terselfdertyd ook 'n vooruitstrewende boer en het, nes Van Reenen, merinoskape uit Frankryk ingevoer en medeboere aangespoor om ook so te maak. Hy het hom deurentyd vir die openbare belang beywer en veral belanggestel in munisipale en kerksake. In 1854 is hy verkies as lid van die pas gestigte Kaapse Wetgewende Raad en jare lank was daar 'n Barry in die ou Kaapse Parlement.

Hy het hom omstreeks 1857 in die Moederstad gaan vestig waar hy 'n meelewende lid van die Kamer van Koophandel was. Ná sy dood het sy nasate die dorpie Barrydale, wat hulle in 1882 aangelê het op 'n gedeelte van die plaas Tradouw Hoek as 'n handelspos en kerksentrum, na hom genoem.[1]