Jonas Kaufmann

Kaufmann is in München gebore. Sy pa het vir 'n versekeringsmaatskappy gewerk en sy ma was 'n kleuterskoolonderwyser. Hy het een ouer suster gehad. Hy het die klavier begin studeer toe hy agt was en in die koor van sy laerskool gesing. Alhoewel hy vir die toelatingseksamens vir wiskunde studeer het, het hy in die somer van 1989 sy stemopleiding aan die Universiteit van Musiek en Uitvoerende Kunste in München begin. Terwyl hy studeer het, het hy 'n paar klein rolle by die Beierse Staatsopera vertolk. Hy gradueer in 1994 aan die universiteit en behaal onderskeidings in beide opera- en konsertuitvoerings.[4]

Kaufmann het in 1995 na 'n vokale krisis bystand ontvang vanaf die Amerikaanse bariton Michael Rhodes wat hom 'n "nuwe manier van sing" geleer het en geleer het hoe om "meer ontspanne in my stem en in my eie vermoë" te word.[5] In Kaufmann se boek getiteld Meinen die wirklich mich? word die volgende gesê, "Om 'n Michael Rhodes te vind wat jou werklik kan help en jou sukses kan besorg is werklik 'n gelukskoot."[6]

Emily Magee as Ariadne en Kaufmann as Bacchus in Ariadne auf Naxos deur Richard Strauss tydens die Salzburg Fees in 2012

Hy het in 1994 sy professionele loopbaan by die Staatstheater Saarbrücken begin[7] en is spoedig daarna uitgenooi om sy buiging te maak in Duitse teaters soos die Staatsoper Stuttgart en Hamburg Staatsopera, sowel as internasionale buigings by die Lyric Opera of Chicago, Opéra National de Paris en La Scala. Hy het sy buiging by die Salzburg Fees in 1999 gemaak in 'n produksie van Busoni se Doktor Faust en in 2003 teruggekeer as Belmonte in Mozart se Die Entführung aus dem Serail en vir konserte van Beethoven se Simfonie No. 9 saam met die Berliner Philharmoniker.

In 2006/7 ontvang hy kritiese lof vir sy vertolking van Don José in Bizet se Carmen by die Royal Opera House, Covent Garden. Hy maak in 2006 sy buiging as Alfredo in Verdi se La traviata by die Metropolitan Opera saam met Angela Gheorghiu, ook tot kritiese lof.[8] In 2007 en 2008 vertolk hy ook dié rol by die Met, en in 2008 by die Royal Opera House. In Mei 2008 vertolk hy die rol van Cavaradossi in Puccini se Tosca by Covent Garden, weereens tot kritiese lof.[9]

In 2008/9 sing hy in Massenet se Manon in Chicago saam met Natalie Dessay. Hy sing ook die titelrol in 'n nuwe opvoering van Wagner se Lohengrin by die Beierse Staatsopera. Hy vertolk ook die rol van Lohengrin tydens die openingsaand van die Bayreuth Fees in 2010 in 'n opvoering deur Hans Neuenfels, met Andris Nelsons as dirigent.

Sy debuutopname met Decca Records, Romantic Arias, is in Januarie 2008 vrygestel. Hy het ook 'n liederesiklus van Schubert opgeneem op dieselfde plate-etiket, asook die rol van Pinkerton in Puccini se Madame Butterfly vir EMI.

In Januarie 2010 sing hy die titelrol in Massenet se Werther by die Opéra Bastille in Parys. Die opvoering is opgeneem en in November 2010 op DVD vrygestel.

In April 2011 keer hy terug na die Metropolitan Opera as Siegmund in Robert Lepage se nuwe opvoering van Wagner se Die Walküre.[10] In September 2011 het hy 'n operasie ondergaan om 'n limfklier uit sy bors te verwyder.[11][12][13] In Desember keer hy terug in Gounod se opera Faust.[10]

Op 15 Februarie 2013 maak Kaufmann sy eerste verskyning in die titelrol van Wagner se Parsifal by die Metropolitan Opera. Sy opvoering ontvang kritiese lof.[14] In Julie van daardie jaar is hy as Kammersänger van die Beierse Staatsopera benoem deur die Ministerie van Kuns van Beiere. In Desember sing hy die rol van Don Alvaro in Verdi se La forza del destino saam met die geselskap.[15]

In Februarie 2014 sing Kaufmann die titelrol in Massenet se Werther by die Met. Hy het hierdie opvoering opgevolg met 'n toer waartydens hy Schubert se liederesiklus Winterreise saam met Helmut Deutsch gesing het.[2] In Junie 2014 het hy sy buiging gemaak in die rol van Des Grieux in Puccini se Manon Lescaut by die Royal Opera House in Londen. Daardie November sing hy dieselfde rol in 'n verdere opvoering van Manon Lescaut by die Beierse Staatsopera.[16]

Op 23 Februarie 2016 is die dokumentêre film getiteld Jonas Kaufmann: An Evening with Puccini in geselekteerde teaters in die Verenigde State vrygestel. Die film handel oor Kaufmann se 2015 opvoering by La Scala in Milaan en bevat rare argiefmateriaal.[17]

In 2018 het Kaufmann sy buiging gemaak as Tristan in konsertopvoerings van die tweede bedryf van Wagner se Tristan und Isolde.[18]

As Paul saam met Marlis Petersen as Marietta in Die tote Stadt, Beierse Staatsopera, 2019

Kaufmann se repertorium sluit die volgende in:

• 2007: Gramophone-toekenning vir Richard Strauss Lieder met Helmut Deutsch voor die klavier
• 2011: Gramophone-toekenning vir Verismo Arias met Antonio Pappano as dirigent
• 2012: Gramophone-toekenning vir Fidelio met Claudio Abbado as dirigent
• 2013: Opera-toekenning vir Beste Manlike Operasanger[39]
• 2013: Gramophone-toekenning vir Wagner Arias met Donald Runnicles as dirigent
• 2018: Beierse Maximilian Orde vir Wetenskap en Kuns[40]

• Thomas Voigt: Jonas Kaufmann: In Conversation With. Weidenfeld & Nicolson, 2017, ISBN 978-1474604277.

• Pasles, Chris (14 Maart 2011). "Tenor puts best face forward". The Los Angeles Times. Los Angeles. p. 28. Besoek op 22 Mei 2020 – via Newspapers.com.

Wikimedia Commons bevat media in verband met Jonas Kaufmann.

• Jonas Kaufmann by bach-cantatas
• Marie d'Origny (26 April 2012). "The Tenor on Stage: An Interview with Jonas Kaufmann". The New York Review of Books (sluit 'n video in van sy opvoering in Così fan tutte in 1998 by die Piccolo Teatro in Milaan)