Johann Rossouw

Johann (J.H.) Rossouw (gebore 1970) het aan die universiteite van Pretoria, Suid-Afrika en Lyon-III (Frankryk) studeer. Hy behaal sy meestersgraad oor die denke van die Franse filosoof Foucault in 1998 aan Unisa. Sy studieleier was C.S. (Fanie) de Beer. In Lyon het Rossouw aan 'n doktorale projek oor die republiek en tegniek in Suid-Afrika, onder leiding van Régis Debray, gewerk (2001-2004). In 2004 behaal hy die DEA (doktorandus) aan die Universiteit van Lyon. Rossouw is 'n kenner van die filosofie van tegniek, politiek en kultuur. Hy het Debray se begrippe van die logosfeer en videosfeer in Suid-Afrika bekendgestel asook die tegno-filosofiese werk van Bernard Stiegler.

Hierdie Johann Rossouw moet nie verwar word met Johann Rossouw wat ook bydraes tot Litnet lewer vanuit Taiwan nie.

Rossouw was navorser-bibliotekaris by die Franse Instituut in Johannesburg (1994-2001) en het 'n sleutelrol gespeel in die organisering van die besoek van Jacques Derrida aan Suid-Afrika in September 1998. Gedurende hierdie tyd begin hy saam met Lamé Ebersöhn die FilosofieKafee in Pretoria. Rossouw was ook bekend vir sy aktivistiese werk in die Afrikaanse openbare lewe. Hy was 'n redaksielid van Fragmente (1998-2005), lid van die werkskomitee van die Groep van 63 (2000-2004) en betrokke by die Federasie van Afrikaanse Kultuurvereniginge (FAK). By laasgenoemde was hy navorsings- en kommunikasiebeampte (2004-2007) en uitvoerende beampte (2007-2008). In die tydperk was hy ook redakteur van Die Vrye Afrikaan. Hierna was Rossouw 'n vryskut skrywer in Pretoria en het hy sy terugkeer na die akademiese wêreld gemaak as deeltydse dosent in sosiale teorie by die Johannesburgse kampus van Monash Universiteit. Hy is vanaf Januarie 2009 'n doktorale student in politieke teorie aan die Monash Universiteit in Melbourne, Australië, waar hy oor die tema van die politieke implikasies van "uitgevoerde moderniteit" met verwysing na Suid-Afrika en Australië werk. Vanuit Melbourne lewer Rossouw nog gereelde bydraes tot Litnet en het hy ook 'n rubriek, Glasoog, vir Beeld se Saterdagbylae By geskryf. Hy het verskeie boeke in Afrikaans vertaal, o.a. Pascal Quignard se Elke Oggend van die Wêreld. In 2007 verskyn sy filofiksie, 'n Rooi Z4 en 'n Renaissance-kasteel, wat handel oor die tydgenootlike Afrikaner-verbruikers (gnossies) in Pretoria. In 2014 volg hy hierdie werk op met Verwoerdburg, wat handel oor die stad wat se naam later Centurion geword het.