Jermak

Jermak of Jermak Timofejewitsj (Russies: Ермак Тимофеевич) (gebore tussen 1532 en 1542 – 5 of 6 Augustus 1585) was ’n Kosak-leier, Russiese volksheld en ontdekkingsreisiger in Siberië. Sy verkenning van Siberië was die begin van Rusland se verowering van die streek. ("Timofejewitsj" was sy patroniem, of vadersnaam, en nie sy van nie. Sy van, as hy een gehad het, is onbekend.)

Die Verowering van Siberië deur Jermak Timofejewitsj, deur Wasili Soerikof

Jermak Timofejewitsj Ермак Тимофеевич
Gebore	omstreeks 1532/1534/1543 Moskowië
Sterf	6 Augustus 1585 monding van die Wagai-rivier, Siberiese Khanaat
Beroep	Kosak-leier

In omstreeks 1577 het die Stroganof-familie van handelaars wat die Oeralstreek gekolonialiseer het, Jermak gevra om hul land teen khan Koetsjoem van die Siberiese Khanaat te beskerm. Jermak het Siberië in 1581 met 1 636 man binnegetrek, al met die Tagil- en Toera-rivier langs.

Die volgende jaar het hulle Isker, Koetsjoem se tuiste, verower. Koetsjoem het na die steppe gevlug en sy gebied aan Jermak afgestaan. Dié het Siberië volgens die destydse tradisie aan tsaar Iwan die Verskriklike oorhandig en so die guns van die tsaar gewen.

In 1585 het Koetsjoem Jermak skielik in die middel van die nag aangeval en die meeste van sy mense vermoor. Jermak is gewond en het probeer om oor die Wagai-rivier te swem, maar het verdrink.

Rusland moes heeltemal uit Siberië onttrek, maar danksy Jermak se verkenning van die riviere het hulle die hele gebied ’n paar jaar later terugverower.