Jef Geeraerts

Jozef Adriaan Anna Geeraerts (23 Februarie 1930 - 11 Mei 2015), beter bekend as Jef Geeraerts, was 'n Belgiese skrywer.

Jef Geeraerts en sy vrou Eleonore Vigenon

Geeraerts is in Antwerpen gebore. Na sy studie in politieke en administratiewe wetenskappe aan die Koloniale Hogeschool van België in Antwerpen word hy 'n koloniale administrateur in die Belgiese Kongo. Met die onafhanklikheid van die Kongo stuur hy sy vrou en kinders terug na België, en in Augustus 1960 keer hy self terug na België. Gedurende die volgende ses jaar word hy deur die regering betaal (terugkeerprogram). Na hierdie tyd moet hy egter werk soek ten einde te kan oorleef. Hy besluit om skrywer te word en studeer Germaanse tale aan die Universiteit van Brussel.

Loopbaan as skrywer

Na afloop van sy studies skryf hy sy eerste roman, Ik ben maar een neger, wat hom uiters kontroversieel maak. Die boek is gebaseer op sy ervaringe as deel van die militêre magte in die Kongo. Hy het meer van hierdie politiek-gemotiveerde koloniale boeke geskryf, voordat hy met sy Gangreen- reeks begin het. Daar is vier dele, Gangreen 1 (Black Venus), Gangreen 2 (De Goede Moordenaar), Gangreen 3 (Het Teken van de Hond) en Gangreen 4 (Het Zevende Zegel). Hierdie boeke was seksueel eksplisiet, welke tot kontroversie in België gelei het. Sy boeke is deur sommige as rassisties en pornografies beskou.

Geeraerts verwerf later bekendheid vir sy speurverhale. Vandag word hy veral gevier as 'n misdaadromanskrywer van formaat, en is verskeie van sy boeke (De zaak Alzheimer en Dossier K) vir film verwerk.

Geeraerts skryf in totaal 35 romans, enkele toneelstukke en ook 'n radiodrama. Twee van sy boeke is 'n film verwerk.

Private lewe

Geeraerts het drie kinders uit sy eerste huwelik gehad, waaronder sy dogter Ilse. In 1978 is hy met Eleonore Vigenon getroud. In sy laaste lewensjare woon hy in Baarle in Oos-Vlaandere, deel van Gent. Hy sterf aan 'n hartaanval in Gent in Mei 2015.  

Toekennings en erkennings
  • 1967 - Arkprijs van het Vrije Woord vir De Troglodieten
  • 1969 - Staatsprijs voor verhalend proza
  • 1986 - de Gouden Strop vir beste Nederlandse misdaadroman

(onvolledige lys)

Die stad Antwerpen het 'n gedenkplaat op die geboortehuis van Geeraerts aangebring. Daarbenewens het die stad sy handgeskrewe argief vir bewaring aangekoop. [1] Die asteroïd 13027 Geeraerts (1989 GJ4) wat op 3 April 1989 deur EW Elst aan die Europese Suidelike Observatorium ontdek is, is na Jef Geeraerts vernoem.

Verwysings
  1. "Writer Jef Geeraerts has died" (in Nederlands). 11 Mei 2015. Besoek op 11 Mei 2015.

Eksterne skakels
This article is issued from Wikipedia. The text is licensed under Creative Commons - Attribution - Sharealike. Additional terms may apply for the media files.