Islam in Suid-Afrika

Die eerste Moslems het Durban tussen 1860 en 1868 met die koms van Indiese kontrakarbeiders uit Brits-Indië bereik. Die Juma Masjid-moskee, in 1881 begin bou en in 1930 voltooi, is die eerste moskee in Durban en die grootste moskee in die Suidelike Halfrond. In 1911 is 152 641 Indiërs na Natal gebring.[5] Vandag is sowat 3,2% van dié stad se bevolking Moslems.

Sowat 3% van Johannesburg se bevolking is Moslems. Vandag bly sowat 10 000 Kaapse Maleiers rondom Johannesburg. Fordsburg vorm 'n sentrum van Indiese en Pakistani-kultuur. Die Nizamiye Masjid in Midrand is in 2012 voltooi en word as een van die grootste moskees in die Suidelike Halfrond beskou.

Kaapstad huisves die oudste gemeenskap van Moslems in Suid-Afrika. Enkele jare ná die stigting van die Moederstad is in 1667 onder die gesag van die Verenigde Oos-Indiese Kompanjie die eerste Maleiers as slawe van Nederlands-Indië na die Nederlandse Kaapkolonie gebring. Hulle het 'n groot invloed op die Suid-Afrikaanse kookkuns en die ontstaan van Afrikaans uitgeoefen. Die Bo-Kaap het van die 18de eeu af tot die kulturele sentrum van die Kaapse Maleiers ontwikkel, nadat hulle uit slawerny vrygelaat is. Vandag bly omtrent 166 000 Kaapse Maleiers in en om Kaapstad, waarvan die oorgrote meerderheid Moslems is en Afrikaans praat. Nes hulle moskees het die Kaapse Maleiers die vyf kramatte rondom Kaapstad. In Kaapstad kom honderde Moslems tydens die laaste aand van Ramadaan in Seepunt bymekaar om die eerste sekelmaan te sien. Dié byeenkoms bring mense van alle vlakke van die samelewing bymekaar en elkeen bring iets saam om dit met ander tydens die breek van die vas te deel. Die Maghrib- of sonsondergebed word gemeenskaplik gedoen en die amptelike maansienresultate word bekend gemaak.[6]

Eid-oel-Fiter word gevier deur in die oggend eers die moskee vir die Eidgebed by te woon. Vervolgens word gesinne en bure besoek. Kinders ontvang geskenke en geld van ouer lede van die gesin, verwante en bure.[7] Die meeste mense dra nuwe klere met helder kleure, terwyl koekies, koeke, samoesas, pasteie en terte vir besoekers aangebied word.[7] Middagete word gewoonlik in gesinsgroepe geniet.