Inversium
Inversium is 'n boek wat deur Dr. François (Swys) Verster geskryf is.
Die Genre
Inversium pas nie perfek in enige subgenre van WF nie, maar kan dalk as “Wetenskaplike Fantasie” bestempel word.
Synopsies op flapteks
“Inversium – die eienaardige planeet wat nie regtig 'n planeet is nie, waar vreemde wesens woon, vreemder as wat op aarde voorkom, dog... hulle kom wel bekend voor. Ook vir hulle wat daar woon, is dinge verwarrend. Wie is die Lig, en wie is die Heks? Wat wil Ariel die Slagter en sy kamerade in die Klowe van Gamadrok gaan maak? Wat is die sending waarop die RorKin-tweeling gestuur word? Al wat seker is, is dat daar 'n agenda is – altans, beslis méér as een! In hierdie sage is niemand te vertrou nie, en is niks seker nie, want 'n horde monsteragtige kreature lê op loer. En nie almal is boorlinge van Inversium nie. Gelukkig is almal nie boos nie. Nie almal nie.”
Titel beskrywing
Die titel verwys enersyds na 'n omgekeerde toestand, m.a.w. 'n milieu wat anders is as die een wat ons aardlinge aan gewoond is en andersyds is dit die naam van 'n planeet.
Milieu
Inversium speel gedeeltelik op die (post-apokaliptiese) aarde af, en gedeeltelik op Inversium ('n vreemde planeet met mitiese kwaliteite).
Storielyn
“Inversium” is 'n tipiese WF-spanningsroman bevolk met kleurvolle karakters, sommige is heroïes en ander weersinwekkend, en die ou konsep van die goeie teen die bose vorm die kern van die verhaal. Verder is daar 'n tipiese “quest”-motief: taakspanne word uitgestuur om 'n wonderkuur te vind wat die oorlewing van die menslike ras kan verseker. Toe hulle Inversium ontdek, word twee aardlinge gestuur om ondersoek in te stel, terwyl een in die “moederskip” agterbly …
Inleiding
Dié boek bevat meer fantasie-elemente as Verster se vorige wetenskapfiksieroman Deur na Nebula Nege, want waar laasgenoemde oor die talle aspekte van verraad handel, gaan Inversium oor wraak – en mites. En mitologie is dikwels verstrengel met godsdiens, legendariese karakters en – in hierdie geval – ’n Valhalla-agtige plek met allerhande “newe-effekte.” Die ou tradisies van volksverhale en sprokies word ook hier ingeweef. Daar is vermenslikte diere, trolle, en vlieënde “drake”, maar ook buiteruimtelike wesens en ’n geheime Nazi-agtige organisasie, almal met eie agendas wat hulle teen alle koste wil uitvoer. Die verhaal is veral ’n kommentaar op oeroue stories wat mense aan mekaar vertel het en later opgeteken is, maar soos alle mites, bevat dit elemente van waarheid – die tragiese verhaal van die buitengewoon talentvolle Hypatia wat in 414 n.C. deur monnike in Aleksandrië vermoor is.
Ontvouing
Terwyl sekere spannende gebeure op Inversium plaasvind – die oorlewingsvaardighede van die karakters word byna onophoudelik getoets – vind ook geheimsinnige dinge in 'n kasteel op aarde plaas.
Intrige
Wat is hierdie Inversium? Is dié planeet 'n natuurlike verskynsel of 'n sintetiese maaksel? Watter wonderbaarlike komponent is op Inversium aanwesig wat ten alle koste bekom moet word? Wie is die Heks en wat is die rede vir haar dodelike gedrag? Hoe ken sy vir Ariel en wat is die verband tussen die enigmatiese vroue wat op Inversium woon? Wat het Hypatia, wat in die antieke Aleksandrië geleef het met hulle te doen? Wie is die pragtige Majoor op wie die aarde se bevelvoerder verlief is? Wat is die verband tussen HiLari, Sinten en Basdian? Hierdie en talle ander vrae word beantwoord wanneer 'n ruimtetuig skielik in Inversium se reënboogagtige lugruim verskyn.
Samevloeiing
Uiteindelik kom die bose en goeie karakters op Inversium byeen en 'n klimaks word bereik toe 'n epiese geveg in die Klowe van Gamadrok uitbreek. Die identiteit van die Heks word ontbloot en dinge begin val uiteindelik in plek.
Karakters
Sommige karakters is aardlinge, sommige is mitiese figure en daar is ook buiteruimtelike wesens – en 'n oulike klein robot.
Hoofkarakters
Ariel, die Heks, Admiraal Resznik, Majoor Umanza, Sonia, die koningin, Sinten, HiLari, Basdian, Orrin, Smirri, Ali.
Ondersteunende karakters
Die Trolle, Ridonii, Taranoks, woduks, griffns en hiskers.
Illustrasies
'n Woduk bespied die omgewing
Die maan skyn helder oor die kasteel langs die Grnau
Beheerkamer van Dantron 3
Ali, die robot
Ariel se langswaard
Een van Ariel se sabelsFile:01 let tus.JPG
Publikasie
“Inversium” is in 2015 deur Thompson Drukkers gepubliseer
Verwerkings
“Inversium” is in beide papier- en e-boekweergawes (met illustrasies) beskibaar.
Toekennings en Vermeldings
Vir Verster se nie-fiksieboek “Op die spore van Simon van der Stel” (2005) het die joernalis Martie Retief-Meiring na hom as 'n “gedugte” argivaris/historikus bestempel. In 2008 het Verster vir sy navoring en artikels in beide vakkundige en populêre publikasies die spesiale trofee van die Minister van Kuns en Kultuur ontvang wat jaarliks aan persone wat erfenissake uitnemend bevorder, toegeken word. Verster het in 2013 die Afrikaanse afdeling van Maskew Miller Longman se jeugromankompetisie gewen met sy historiese roman “Een teen Adamastor.” Sy kortverhaal “Stort by die werk”wat in die bundel “Skalakenkoors” (2014) opgeneem is, is in Husigenoot georys as die storie met die mees onvoorspelbare einde in die betrokke bundel.
Biografie
Verster (gebore 24 Januarie 1962, Bellville, S.A.) het aan die Universiteit van Stellenbosch gestudeer – Gesk. Honneurs, M.A. (Gesk.), H.O.D. en D. Phil (Kultuurgesk.). Sy liefde vir boeke en kennis en die behoefte om 'n bydrae daartoe te maak lei tot navorsing en sou uiting vind in honderde skryfsels in verskillende genres. Gedurende sy dienspligjare (1986–1987) het hy vir Boesmans skoolgegee, daarna (1988–1990) by Kaaplandse skole. In 1991 begin hy by die Staatsargief in Kaapstad werk tot 2007. Intertyds verwerf hy 'n nagraadse diploma in Argiefwetenskap (Tech SA). In Julie 2007 begin hy by Naspers werk as maatskappy-argivaris en verwerf 'n diploma in Joernalistiek (CPUT) en 'n Meestergraad in Joernalistiek (Univ. Stellenbosch). Sedert die 1990s begin hy akademiese en vakkundige artikels skryf, later ook vir populêre publikasies, insluitend rubrieke en resensies. Sy rubriek “Geskiedenis” vandag loop steeds ononderbroke vanaf 2007. Sedertdien het hy tot dosyne publikasies, in papier of elektroniese formate bygedra. Hierdie daaglikse skryfoefening was goeie voorbereiding vir langer werke en sy eerste nie-fiksie boeke verskyn in 2004 en 2005, nl. “Van Kapaas tot Kaas” en “Op die Spore van Simon van der Stel”, dan volg fiksieboeke , nl. “Een teen Adamstor” (2013), “Deur na Nebula 9” (2014), “Inversium” (2015) en “Omega” (2016).
Ander boeke deur die skrywer
Ander boeke deur dr. Francois Verster wat in 2016 verskyn, sluit in "Omega, oor en uit" byTafelberg, (die verhaal van ’n onwillige Dienspligtige) en "Die Groot Drie", oor die spotprenttekenaars van Die Burger (1915–2015) by Penguin S.A. Hy het sedert die 1990’s vakkundige artikels, kortverhale, kinderverhale en –rympies, asook ’n verskeidenheid rubrieke, artikels en boekresensies in tydskrifte, koerante, webblaaie en boekbundels gepubliseer. Sy memoir "Omega, oor en uit" is in Die Burger aangeprys as "Die Grenslit-boek van 2016 wat gelees moet word." Die skrywer Dan Sleigh bestempel dit as "beide 'n lekker lees en insiggewend", en ook Pieter Haasboek, Dana Snyman en die historici Fransjohan Pretorius en Hans Heese beveel dit aan.
Sien ook
Eksterne skakels
- www.Stellenboschwriters.com
- www.facebook.com/Afrifiksie
- www.Litnet.co.za
- www.nb.co.za
- Murray La Vita gesels met François Verster