Internasionale Ruimtestasie
Die Internasionale Ruimtestasie (IRS) is ’n ruimtestasie wat om die Aarde wentel en deur verskillende lande gebou, beman en onderhou word. Die eerste module is op 20 November 1998 gelanseer en die stasie word sedert 2 November 2000 permanent bewoon. Dit is in die eerste tien jaar van die huidige eeu aanhoudend uitgebrei en op 27 Mei 2011 voltooi.
Die Internasionale Ruimtestasie dien as 'n mikrogravitasie- en ruimtenavorsings-laboratorium waarin bemannings eksperimente kan uitvoer in biologiese, menslike, fisika, astronomie, meteorologie en ander velde.
Geskiedenis
In 1982 het die Amerikaanse president Ronald Reagan voorgestel dat ’n internasionale ruimtestasie met die naam Freedom gebou word. Daar het egter niks van gekom nie en in die begin van die 1990's is die konsep en die naam gewysig. Rusland, wat besef het dat daar geen verdere toekoms in hul ruimtestasie, Mir, was nie, het besluit om aan die projek deel te neem en sy eie planne vir Mir 2 op die ys gesit.
Om ervaring op te doen met ruimtestasies (onder meer langdurige verblyf in die ruimte), het die VSA en Rusland ’n ooreenkoms aangegaan wat bekend was as Fase Een. Daarvoor is omvattend gebruik gemaak van die Mir-ruimtestasie. In September 1993 het Al Gore en Wiktor Tsjernomirdin die planne van Fase Twee aangekondig. Dit was die daadwerklike bou van die Internasionale Ruimtestasie.
Op 29 Januarie 1998 is die ooreenkoms vir die ruimtestasie deur 16 lande onderteken. Dit het die basis gevorm van die grootste internasionale wetenskaplike projek in die geskiedenis van ruimtevaart. Die deelnemende lande is (in alfabetiese volgorde):
Fase Drie van die projek behels die volledige werking en permanente bewoning van die ruimtestasie.
Huidige status
Die IRS se wentelbaan is tussen 330 en 435 km van die aarde af. Dit beweeg teen 7 706,6 m/s (27 743,8 km/h) en voltooi 15,7 wentelings per dag. Dit sal moontlik tot in 2028 in werking wees, waarna dit uit sy wentelbaan gehaal sal word sodat dit in die see kan neerstort.[1]
Waarneembaarheid
Vanweë die grootte van die Internasionale Ruimtestasie, veral van die sonpanele, is dit maklik met die blote oog sigbaar van die Aarde af. NASA het ’n lys met besonderhede wanneer die IRS van Suid-Afrika af sigbaar is.[2]
Sien ook
- Sterrekunde-portaal
Verwysings
- Suffredini, Michael (1 Oktober 2010). "ISS End-of-Life Disposal Plan" (PDF). NASA. Geargiveer vanaf die oorspronklike (PDF) op 5 April 2012. Besoek op 7 Maart 2012.
- "Die IRS van Suid-Afrika af gesien". Geargiveer vanaf die oorspronklike op 19 Oktober 2015. Besoek op 12 Junie 2013.
Eksterne skakels
- IRS op die Nasa-webtuiste
- IRS op die ESA-webtuiste
- Ligging van die IRS t.o.v. die Aarde Geargiveer 8 April 2007 op Wayback Machine
Wikimedia Commons het meer media in die kategorie Internasionale Ruimtestasie.
Hierdie artikel is vertaal uit die Nederlandse Wikipedia
