Ina de Villiers

S.J.A. (Ina) de Villiers (1919–2010) was die skrywer van die Afrikaanse kookboek, Kook en Geniet, wat ook in Engels vertaal is.[1] Daar is in 2005 geskat dat meer as 'n half miljoen Afrikaanse eksemplare verkoop is. Teen die tyd van die skrywer se dood het verkope in beide tale meer as 'n miljoen oortref, wat dit die suksesvolste Suid-Afrikaanse kookboek ooit maak. Sedert die eerste uitgawe tot die outeur se dood was die boek nooit uit druk gewees nie.[2]

Ina de Villiers
Gebore
S.J.A. van Schalkwyk

24 Februarie 1919
Sterf20 September 2010
Stellenbosch
NasionaliteitSuid-Afrikaner
BeroepSkrywer
Bekend virKook en Geniet
EggenootJapie de Villiers
KindersEunice en Heleen

Biografie

Stoffelina Johanna Adriana van Schalkwyk is op 24 Februarie 1919 op Boshof, Oranje-Vrystaat gebore. Haar ouers was Johannes Zacharias en Eunice Mehetabeel (née Ferreira). Sy het huishoudkunde aan die Universiteit Stellenbosch studeer en verwerf in 1940 die graad BSc Huish.

Sy skryf haar eerste kook- en kombuisgids (Kook en Geniet) om jong vroue te help, maar niemand wou dit publiseer nie. In 1951 besluit sy om die boek saam met haar man, Japie de Villiers, 'n geoloog, en met die hulp van prof. Mattie Jooste te publiseer. Die boek word 'n reuse sukses.

In 1961 publiseer sy die Engelse vertaling, Cook and Enjoy It, wat net so 'n groot sukses was.

In 1990 tree hulle uit die drukkersbedryf en Human & Rousseau neem die regte (vir produksie en bemarking) oor. In November 2009 publiseer Human & Rousseau 'n opgedateerde weergawe met die hulp van Ina se dogter, Eunice van der Berg.

Die ATKV het in Mei 2010 aan haar die Afrikroon-prys toegeken.

De Villiers is op 20 September 2010 op 91-jarige ouderdom oorlede. Sy was getroud met Jacob Eliza de Villiers (1912-1990). Sy word oorleef deur haar twee dogters en ses kleinkinders.

Bibliografie
  • Kook En Geniet, ISBN 978-0-7981-4918-1
  • Cook and Enjoy, ISBN 978-0-7981-4919-8
  • Die Klein Kook en Geniet (mede outeur: haar dogter, Eunice van der Berg), ISBN 978-0-7981-5251-8
  • Cook and Enjoy for Kids, ISBN 978-0-7981-5252-5

Verwysings
  1. Biografie op stellenboschwriters.com, besoek op 23 Julie 2013
  2. Skrywer van ‘Kook en geniet’ sterf op 91 jaar[dooie skakel], Beeld, 22 September 2010
This article is issued from Wikipedia. The text is licensed under Creative Commons - Attribution - Sharealike. Additional terms may apply for the media files.