Imperial Airways
Imperial Airways was 'n Britse kommersiële lugredery wat tussen 1924 en 1939 bestaan het en baanbrekerswerk gedoen het met die instelling van lugroetes tussen die Verenigde Koninkryk en bestemmings in vastelandse Europa asook die Britse Ryk soos Suid-Afrika, Indië en die Verre Ooste, insluitende Malaya en Hong Kong. In Oseanië is vennootskappe aangegaan met twee plaaslike lugdienste, Qantas (Queensland and Northern Territory Aerial Services Ltd) in Australië en TEAL (Tasman Empire Airways Ltd) in Nieu-Seeland.
 | |||||||
| |||||||
| Gestig | 31 Maart 1924 | ||||||
|---|---|---|---|---|---|---|---|
| Eerste vlug | 26 April 1924 | ||||||
| Laaste vlug | 24 November 1939 | ||||||
| Bedryfsbasisse | Lughawe Croydon, Londen | ||||||
| Hoofkantoor | Croydon, Londen, Engeland | ||||||
| Sleutelpersone | Rt Hon Sir Eric Geddes GCB, GBE (voorsitter), Sir Herbert Hambling, majoor J.W. Hills | ||||||
In 1939 is Imperial Airways saamgesmelt met British Overseas Airways Corporation (BOAC) wat op sy beurt met British European Airways Corporation saamgesmelt is om die nuwe lugredery British Airways te vorm.
Geskiedenis
Met die stigting van Imperial Airways het die Britse regering in 1924 die Hambling-komitee se aanbevelings oor die toekoms van Britse lugdienste geïmplementeer. Die lugredery is op 31 Maart geïnkorporeer met die doel om 'n kommersiële Britse lugvaartbedryf te vestig, met 'n vloot van vliegtuie wat van bestaande lugrederye soos The Instone Airline Limited, The Daimler Airway, Handley Page Transport Limited en British Marine Air Navigation Co Ltd (wat destyds 'n vliegbootdiens tussen Southampton en die Kanaaleiland Guernsey bedryf het) oorgeneem is. Dié lugrederye is almal saamgesmelt tot Imperial Airways.
Met Croydon-lughawe in Suid-Londen as sy hoofbasis het Imperial Airways regeringsubsidies ter waarde van £1 miljoen ontvang wat oor 'n tydperk van tien jaar uitbetaal is met die voorwaarde dat lugroetes na bestemmings in die Britse Ryk ingestel moes word - na Suid-Afrika, Indië en uiteindelik ook Australië, aanvanklik veral om lugpos te vervoer. Sir Eric Geddes is as voorsitter aangestel.
Imperial Airways se vloot het aanvanklik uit drie Handley Page W.8bs, twee Supermarine Sea Eagles, een Vickers Vimy Commercial en sewe DH34s bestaan. Dit was almal eenvoudige vliegtuie wat gebruik kon word om Europese roetes na Parys, Zürich, Basel, Amsterdam, Hannover en Berlyn te bedien.
Die eerste vlug is op 26 April met 'n DeHavilland DH34 vanuit Croydon na Parys se Le Bourget-lughawe onderneem, met kaptein H.S. Robertson as vlieënier. Vanaf 3 Mei is daaglikse vlugte vanuit Croydon op die roetes na Brussel en Keulen aangebied. Die roete Londen (Croydon)-Amsterdam-Hannover-Berlyn is in samewerking met die Duitse lugredery Deutsche Aero-Lloyd AG vanaf 2 Junie op weekdae bedien, terwyl drie vlugte per week op die roete Londen (Croydon)-Parys-Basel-Zürich vanaf 17 Junie aangebied is.[1]