Igor Sikorsky

Igor Sikorsky
Igor Sikorsky
Gebore	Igor Ivanovich Sikorsky; 25 Mei 1889; Kiëf, Russiese Ryk
Sterf	26 Oktober 1972; Easton, Connecticut, VSA
Nasionaliteit	Russiese Amerikaner
Beroep	Ingenieur
Bekend vir	Vliegtuie en helikopters
Eggenoot	Olga Fyodorovna Simkovitch, Elisabeth Semion
Kinders	Tania, Sergei, Nikolai, Igor, George

Igor Ivanovich Sikorsky (Oekraïens: І́гор Іва́нович Сікорський, Russies: И́горь Ива́нович Сико́рский, Afrikaanse transliterasie: Igor Iwanowitsj Sikorski; 25 Mei 1889 - 26 Oktober 1972) was 'n ingenieur wat helikopters en vliegtuie gebou het. Hy is gebore in Kiëf, Russiese Keiserryk (nou Kijif in Oekraïne). Hy studeer aan die Russiese Vlootkollege in Sint Petersburg en doen gevorderde studies by die Instituut van Tegnologie in Kiëf en later in Frankryk. Teen 1911 het hy reeds verskeie vliegtuie en twee helikopters gebou. Die tweede kon sy eie massa van 400 pond van die grond af lig.

Loopbaan

Van 1912 tot 1918 was hy die hoof van die ingenieurswese-afdeling van die Russo-Baltic Railroad Car Works. Hier ontwerp en bou hy van 1913-1914 die eerste veelvoudige-enjin-vliegtuie. In die Eerste Wêreldoorlog bou hy 75 vierenjinbomwerpers vir die Russiese weermag. In 1918 gaan hy na Frankryk, waar hy dieselfde taak verrig.

Ná die Eerste Wêreldoorlog verhuis hy na Amerika. Van 1919 af werk hy by Hanevig-Sikorsky Aircraft Corporation en van 1923 af by Sikorsky Aero Engineering Corporation. In 1928 word sy maatskappy 'n afdeling van United Aircraft Corporation, met Sikorsky as hoofingenieur. Hy tree in 1957 hier af.

Vliegtuie en helikopters gebou

Sikorsky se eerste vliegtuig wat hy in Amerika gebou het, was die S-29, 'n twee-enjin-dubbeldekker, in 1923. Hierdie vliegtuig is in die rolprent Hell's Angels vernietig. In 1929 het hy die S-38 verskaf aan Pan American Airways. Die S-40 en S-42 is onderskeidelik in 1931 en 1932 voltooi. Albei vliegtuie was toegerus met konstante-spoed-skroewe. Die S-42 het in 1934 'n hoogterekord van 20 407 voet opgestel. Die S-38, voltooi in 1934, het 'n spoedrekord opgestel. Later het hy sy aandag gevestig op die bou van helikopters.

Bron

Colliers Encyclopedia Vol 21. Bladsy 23. 1970.

This article is issued from Wikipedia. The text is licensed under Creative Commons - Attribution - Sharealike. Additional terms may apply for the media files.