Ian en Dix

Ian & Dix is 'n musikale duo wat bestaan uit Ian Mostert (gebore in Kroonstad, Oranje-Vrystaat, op 11 Januarie 1949) en Dix Vorster (gebore in Uitenhage, Kaapprovinsie, op 25 November 1945). Die twee was saam op skool in Kroonstad nadat Dix se gesin daarheen verhuis het toe hy ses was.

Na skool het Ian landbou gestudeer terwyl Dix op die myne gaan werk het. Dix is toe Johannesburg toegestuur om verder te gaan studeer en Ian het daarheen verhuis om by 'n mediamaatskappy te gaan werk. Hulle het in 1969 saam begin sing en gou by RPM geteken. Hulle eerste vrystelling was in dieselfde jaar en was 'n Engelse liedjie genaamd 'The Women Have Taken The World' wat verkeerdelik uitgegaan het as Ian Dix in plaas van Ian & Dix. Hulle het geen sukses hiermee gevind nie, maar albei van hulle het in die musiekwereld begin werk, Ian by Record and Tape en Dix by Gallo.

In 1976 het Ian 'n demo van 'Sonder Jou' gehoor in 'n kantoor by Gallo en by navraag uitgevind dat die liedjie deur Jan de Wet geskryf is en oorspronklik vir Sonja Herholdt bedoel was, maar sy het dit van die hand gewys. Ian het gevra of hy en Dix dit kon opneem. Die resultaat was hul enigste SA-treffer wat #3 bereik het. Hulle sou nog 'n paar plate maak, maar het nie veel verdere sukses gehad nie.