Holmenkollen-skans
Die Holmenkollen-skans is 'n skispring-skans in Holmenkollen, 'n stadsdeel van die Noorse hoofstad Oslo. Dit is een van Oslo se bekendste bakens asook die mees besoekte toeristetrekpleister in Noorweë en die bekendste skispring-skans ter wêreld.
Met 'n geskiedenis wat terugstrek tot 1892 is dit ook die wêreld se oudste skispring-skans wat steeds in gebruik is. Ná die laaste ombou het die skans 'n konstruksiepunt van 120 meter en 'n grootte (amptelik hillsize) van 134 meter. Die skans is vir die Olimpiese Winterspele 1952 en die wêreldkampioenskappe van 1930, 1966 en 1982 gebruik. In 2011 word die FIS se Nordiese Ski-wêreldkampioenskappe hier gehou. Daarnaas word die Holmenkollen-skans jaarliks vir die spesiale en gekombineerde skispring-wêreldkampioenskappe gebruik.