Hesperide
Die Hesperides (Grieks: Ἑσπερίδες) was in die Griekse mitologie nimfe wat ’n lieflike tuin in die verre westelike deel van die wêreld versorg het. Dit was naby die Atlasgebergte in die hedendaagse Tanger, Marokko, geleë op die rand van die omringende Okeanos, die wêreldoseaan.
Hulle was die dogters van die Titaan Atlas en in die meeste mites drie, nes die Grasieë.
Die Tuin van die Hesperides
Die Tuin van die Hesperides was Hera se boord met goue appels wat aan iemand onsterflikheid kon gee. Die boord is geplant van die vrugtetakke wat Gaia vir Hera present gegee het nadat sy ingestem het om Zeus se metgesel te word. Die Hesperides moes die bome versorg, maar die wantrouige Hera het ook ’n honderdkoppige draak wat nooit slaap nie, Ladon, aangestel as bewaker van die appels.
Die Hesperides en Herakles
Een van twaalf onmoontlike take wat die held Herakles moes uitvoer op bevel van die jaloerse Hera, was om van die goue appels in die tuin te gaan haal. Herakles gaan toe na Atlas en bied aan om die hemelruim vir ’n rukkie vas te hou terwyl Atlas die appels by sy dogters gaan haal.
Toe hy terugkeer, probeer Atlas egter om Herakles ’n rat voor die oë te draai en hom met die hemelruim op sy skouers te los deur aan te bied om self die appels af te lewer. Herakles vermoed egter wat Atlas beplan en sê Atlas moet die hemelruim net weer vir ’n rukkie vashou terwyl hy sy mantel om sy skouers draai om as kussing te dien. Toe Atlas die appels neersit en die hemelruim terugneem op sy skouers, gryp Herakles die appels en hardloop weg.
Verwysings
- Hierdie artikel is merendeels vertaal vanaf die Engelse Wikipedia-artikel en:Hesperides
| Landnimfe |
|  |
|---|---|---|
| Boomnimfe |
| |
| Waternimfe | ||
| Ander | ||
Normdata  |
|---|