Heraklonas van Bisantium
Heraklonas (Latyn: Constantinus Heraclius, Grieks: Κωνσταντῖνος Ἡράκλειος; oorl. 641) was kortliks van Februarie tot September 641 die Bisantynse keiser. Hy was die seun van keiser Herakleios en sy niggie Martina.
| Heraklonas | |
|---|---|
| Keiser van die Bisantynse Ryk | |
 ’n Muntstuk wat Heraklonas, sy pa en broer uitbeeld. | |
| Bewind | Februarie-September 641 |
| Volle naam | Constantinus Heraclonas |
| Dinastie | Herakleios |
| Oorlede | 641 |
| Voorganger | Konstantyn III Herakleios |
| Opvolger | Constans II |
| Vader | Herakleios |
| Moeder | Martina |
Hy is gebore en het regeer as Constantinus Heraclius, maar die verkleiningsvorm Heraklonas (klein Herakleios) word in Bisantynse en moderne geskrifte gebruik.
Teen die einde van Herakleios se bewind, op 4 Julie 638, het hy Heraklonas tot medekeiser verklaar saam met sy halfbroer, Konstantyn III. Konstantyn het hul pa opgevolg en ná sy voortydige dood in Mei 641 was Heraklonas die alleenheerser. Maar gerugte dat sy ma, Martina, Konstantyn vergiftig het, het daartoe gelei dat laasgenoemde se seun Constans as medekeiser aangestel is. Martina en haar seuns is daarna afgesit, vermink en verban. Constans II het toe alleenheerser geword.
Niks verder is van Heraklonas bekend nie, maar daar word vermoed dat hy later in die jaar van sy afsetting dood is.
Bronne
Hierdie artikel is vertaal uit die Engelse Wikipedia
- The Oxford Dictionary of Byzantium, Oxford University Press, 1991.
Eksterne skakels
Wikimedia Commons het meer media in die kategorie Heraklonas.
