Heard- en McDonaldeilande

Die Heard- en McDonaldeilande (Engels: Heard Island and McDonald Islands, afgekort: HIMI) is 'n onbewoonde en onherbergsame eilandgroep in die suide van die Indiese Oseaan op dieselfde breedtegraad as Vuurland en op dieselfde lengtegraad as Moembaai. Dit lê 1 700 km van Antarktika, 4 100 km suidwes van Perth en 4 200 km suidoos van Suid-Afrika. Die naaste eiland is die Kergueleneilande, wat 450 km noordwes daarvan lê. Die eilande val onder jurisdiksie van Australië. Om onduidelike redes het die eilande (sonder ekonomiese aktiwiteit) sy eie topvlak-domein .hm gekry.

Heard- en McDonaldeilande Inheemse naam: Heard Island and McDonald Islands
Satellietbeeld van die Heard- en McDonaldeilande
Geografie
Ligging	Indiese Oseaan
Koördinate	53°06′S 73°31′O
Argipel	Heard- en McDonaldeilande
Hoofeilande	2
Oppervlakte	368 km2
Hoogste punt	Mawson Peak 2 745 m
Administrasie
Australië
Eksterne gebied	Heard- en McDonaldeilande
Demografie
Bevolking	0

Ligging van die Heard- en McDonaldeilande in die Indiese Oseaan

Kaart van die Heard- en McDonaldeilande

Heard is vernoem na sy ontdekker, James Heard, 'n robbejagter wat die eiland op 25 November 1853 vir die eerste keer waargeneem het, en die McDonaldeilande na hulle ontdekker, William McDonald, 'n kaptein wat die eilande op 4 Januarie 1854 gesien het.

Die Heard- en McDonaldeilande is sedert 1947 'n gebied van Australië. Hulle word deur die Australiese Antarkriese afdeling van die departement van die omgewing en van erfenis in Canberra beheer. Hulle is in 1997 op UNESCO se lys van wêrelderfenisgebiede gevoeg. Die rede is dat die eilandgroep die enigste subantarktiese vulkaanaktiwiteit toon, waarby geomorfologiese prosesse en glasiale dinamika waargeneem kan word. Die fauna en flora is uniek, sonder veel invloede van buite die eilandgroep.