Hay
Hay is 'n historiese naam vir die landstreek rondom die dorpe Griekwastad, Niekerkshoop en Campbell in die Noord-Kaap.
Ligging
Aan die noordekant grens dit aan Griekwaland-Wes. Die Langberge vorm die westelike grens. Suidwaarts gaan die streek tot die Asbesberge en vorm die Oranjerivier die grens vanaf Kheis, verby Prieska en dalk tot sover as Douglas, Hopetown tot by Ramah (die mees westelike punt van die Vrystaat). Die suidelike deel van die historiese Ramah-Platberglyn is dan die oosgrens.
Ekonomie
Die steek is baie dun bevolk. Ahoewel met beeste en skape geboer word, is water orals min. Die Hay-besproeiingsgronde lê noordoos van Prieska langs die Oranjerivier. In die grond kom asbes en mangaan voor.
Geskiedenis
In die geskiedenis was hierdie gebied deel van die Diamantveldkwessie. Goewerneur Benjamin D'Urban het in 1834 'n verdrag met die Andries Waterboer en Nicolaas Waterboer gesluit. Vandaar ook die naam Waterboersland. Die naam Hay vir die area is afkomstig van 'n Britse staatsamptenaar, lt.genl. Charles Crauford Hay, wat in 1870 vir ses maande as luitenant-goewerneur in die Kaapkolonie waargeneem het.