Hawaii (eiland)

Hawaii is die grootste eiland van en naamgewer vir die Amerikaanse deelstaat en gelyknamige eilandketting Hawaii in die sentrale Stille Oseaan met 'n oppervlakte van 10 432,5 vierkante kilometer en 'n bevolking van 185 079 in 2010. Om verwarring met die deelstaat te voorkom, word die eiland deur sy bewoners meestal The Big Island (Die Groot Eiland) genoem. Ander byname, wat minder gebruiklik is, is Orgideë- en Vulkaaneiland.

Topografiese kaart van die eiland Hawaii
Die swart basaltsand van Punaluʻu-strand
Hawai'i
The Big Island
Landsat mosaic, 1999–2001
Landsat mosaic, 1999–2001
Geografie
Location in the state of Hawaii
Ligging19°34′N 155°30′W
Oppervlakte10 432,5 vk km
Geranglys1ste, grootste eiland van die deelstaat Hawaii
Hoogste puntMauna Kea
  4 205 m
Demografie
Bevolking185 079 (2010)
Bevolkingsdigtheid17,7/vk km
Amptelike simbole
BlomLehua-bloeisel (Metrosideros polymorpha)
KleurUla Ula (Rooi)

Die eiland het die kenmerkende vorm van 'n driehoek en beslaan twee derdes van die Hawaise eilandketting se oppervlakte. Hawaii beskik met sy golwende weilande, tropiese reënwoude en woestyne, sneeubedekte bergpieke en strande oor die grootste verskeidenheid landskapsvorme van alle eilande. Sy vulkane is die grootstes en mees aktiewes op ons planeet.[1]

Hawaii het eers sowat 500 000 jaar gelede ontstaan en is sodoende geologies sowel die jongste van die Hawaise eilande asook een van die jongste landmassas op aarde. Twee van sy vyf vulkane, Mauna Kea (4 205 meter) en Mauna Loa (4 169 meter), is die hoogste bergpieke van die eilandketting en ook die enigste twee wat gedurende die wintermaande met sneeu bedek is. As gevolg van voortgesette vulkaniese aktiwiteite groei die eiland Hawaii nog steeds. Die hoofstad Hilo is die enigste stedelike nedersetting op die andersins yl bevolkte eiland.

Verwysings
  1. The Smithsonian Guides to Natural America: The Pacific – Hawai'i and Alaska. Washington, DC: Smithsonian Books; New York, NY: Random House 1995, bl. 19

Eksterne skakels
This article is issued from Wikipedia. The text is licensed under Creative Commons - Attribution - Sharealike. Additional terms may apply for the media files.