Hatfield, Pretoria

Dit is oos van die stadskern geleë. Die noordelike grens met Colbyn en die Presidentswoning word deur Kerkstraat gevorm, die westelike grens met Arcadia deur Hillstraat en Roperstraat, die suidelike grens met Hillcrest deur Boundarystraat en Lynnwoodweg. Die oostelike grens word gevorm deur die LC de Villierssportgronde van die Universiteit van Pretoria. Hatfield word in Hatfield-Noord en Hatfield-Suid verdeel deur die spoorlyn wat rofweg oos-wes deur die buurt loop.[1] Hatfieldstasie is die noordelikste punt waar die Gautrein stop.

Die voorstad Hatfield is geproklameer op 'n gedeelte van die plaas Koedoespoort wat in 1859 aan Lourens Cornelius Bronkhorst toegeken is. 'n Erfgenaam van Bronkhorst het die plaas in 1885 aan die Wesleyaanse Metodiste Vereniging (Engelse: Wesleyan Methodist Society) verkoop. Die grond is na die Tweede Vryheidsoorlog in 1903 aan die Koloniale Sekretaris van die Transvaal, Patrick Duncan, verkoop. Die voorstad is vernoem na Hatfield House, 'n landgoed in Herfordshire, Engeland wat behoort het aan die Tweede Graaf van Selbourne, wat in 1905 Goewerneur van die Transvaal geword het.[1]

Die eerste besigheid in Hatfield was die Hatfield Bakkery, wat deur in 1932 deur Sakkie Andrews geopen is. Dit is later gevolg deur die Rissik Station Stores en die meerverdieping Hatfield Galleries in Burnettstraat. Sedert die laat 1980's het die karakter van Hatfield vinnig verander soos al hoe meer besighede in die gebied opgerig is en vandag is dit 'n multifunksionele buurt met slegs 18% van die oppervlak steeds residensieel van aard.[1]

Die Springbokparkie is in Hatfield.