Hampstead Heath
Hampstead Heath (plaaslik ook kortweg "the Heath" genoem) is 'n uitgestrekte ou park en openbare groen ruimte in die noorde van Londen wat oor 'n oppervlakte van sowat 790 akkers (320 hektaar) strek. Die park bestaan hoofsaaklik uit oop grasvelde en bosse en is op 'n sanderige heuwel geleë. Dié heuwel - een van die hoogste punte in die Britse hoofstad - strek van Hampstead tot Highgate.
Die heuwelagtige parkterrein behels naas historiese en nuut aangeplante bosse enkele vywers, 'n openbare swembad, speelterreine en 'n oefenpad. Die park grens in die noorde aan Kenwood House, 'n herehuis. Parliament Hill, 'n heuwel in die suidweste van die park, bied 'n uitsig oor Londen wat as natuurmonument beskerm word.
Hampstead Heath word deur die City of London Corporation bestuur en behoort administratief grotendeels aan die stadsdistrik London Borough of Camden, met uitsondering van Hampstead Heath Extension en Golders Hill Park wat in die London Borough of Barnet geleë is.
