Guaraní

Guaraní (avañe'ẽ, [aʋãɲẽˈʔẽ], letterlik: "die mense se taal") is naas Quechua die belangrikste inheemse taal van Suid-Amerika wat deur sowat 4,9 miljoen mense in Argentinië, Bolivië, Brasilië en Paraguay gepraat word. Dit word veral deur die Guaraní gepraat en vorm saam met Aymara, Quechua en Spaans die amptelike tale van Bolivië asook saam met Spaans die amptelike tale van Paraguay.

Verspreiding van Guaraní

Hierdie artikel handel oor die taal. Vir die etniese groep, sien Guaraní (volk).

Guaraní Avañe'ẽ
Uitspraak:	[aʋãɲẽˈʔẽ]
Gepraat in:	Argentinië  Bolivië  Brasilië  Paraguay
Totale sprekers:	4,9 miljoen[1]
Taalfamilie:	Tupí  Tupí-Guaraní   Guaraní
Skrifstelsel:	Latynse alfabet
Amptelike status
Amptelike taal in:	Bolivië  Paraguay
Gereguleer deur:	geen
Taalkodes
ISO 639-1:	gn
ISO 639-2:	grn
ISO 639-3:	grn

Guaraní word oorwegend in die noordweste en noordooste van Argentinië, in die suidooste van Bolivië, in die suide van Brasilië en in Paraguay gepraat. Dit vorm saam met ander taalgroepe soos Guarayu, Tupí, Tenetehara, Kawahib en Xingu die taalfamilie Tupí-Guaraní, waarvan Tupí en Tupinambá verdere bekende, maar uitgestorwe, tale is. Bekende Afrikaanse leenwoorde uit Guaraní of die nouverwante Tupi sluit kapibara, jaguar, jaguarundi, tapir, Maracas, nandoe en piranha in.