Groot Muur van Sloan

Die Groot Muur van Sloan is ’n kosmiese struktuur van sterrestelsels wat ’n filament genoem word. Tot die ontdekking van die U1.27 in Januarie 2013 was dit die grootste bekende struktuur in die heelal. Die ontdekking van die Groot Muur is op 20 Oktober 2003 deur J. Richard Gott III, Mario Jurić en hulle kollegas aangekondig. Dit was geskoei op data van die Digitale Sloan-lugopname.[1]

Die Groot Muur van Sloan in ’n rekonstruksie van binneste dele van die 2dF-rooiverskuiwingopname.

Grootte

Die muur is 1,37 miljard ligjare lank en is sowat 'n miljard ligjare van die Melkweg af geleë. In die lug lê dit in die streek van die sterrebeelde Kraai, Noordelike Waterslang en Sentour. Dit maak sowat 1⁄60 uit van die deursnee van die sigbare heelal en is die sesde grootste bekende voorwerp in die ruimte, ná onderskeidelik die groot kwasargroepe Clowes-Campusano-GKG, U1.11 en die Groot GKG; die Reusegammaflitsring; en die galaktiese filament Groot Muur in Hercules-Corona Borealis.

Die Groot Muur van Sloan is tussen 1,8 en 2,7 keer so groot soos die Groot CfA2-muur van sterrestelsels wat in 1989 deur Margaret Geller en John Huchra van die Harvard-universiteit ontdek is.[2] Dit bevat ook verskeie sterrestelsel-superswerms, waarvan die grootste een SCl 126 genoem word. Dit is in die digste streek van die struktuur geleë.[3][4]

In 2011 is voorgestel dat die muur ’n toevallige oplyning van drie strukture is en nie ’n struktuur op sy eie nie.[5]

Sien ook

Verwysings
  1. Gott, J. Richard, III et al. (May 2005), "A Map of the Universe", The Astrophysical Journal 624 (2): 463–484, doi:10.1086/428890, Bibcode: 2005ApJ...624..463G Figure 8 – "Logarithmic Maps of the Universe" – is available as a poster from the homepage of Mario Juric.
  2. Geller, Margaret J.; Huchra, John P. (1989-11-17), "Mapping the Universe", Science 246 (4932): 897–903, doi:10.1126/science.246.4932.897, PMID 17812575, Bibcode: 1989Sci...246..897G
  3. Einasto, M. et al. (July 2011), "The Sloan Great Wall. Morphology and Galaxy Content", The Astrophysical Journal 736 (1): 51, doi:10.1088/0004-637X/736/1/51, Bibcode: 2011ApJ...736...51E
  4. "The Sloan Great Wall -- Supercluster of Galaxies", SIMBAD (Centre de Données astronomiques de Strasbourg), http://simbad.u-strasbg.fr/simbad/sim-id?Ident=SCl+126, besoek op 2011-12-24
  5. Roger G. Clowes, Luis E. Campusano, Matthew J. Graham, Ilona K. Soechting; "Two close Large Quasar Groups of size ~ 350 Mpc at z ~ 1.2"; Monthly Notices of the Royal Astronomical Society, vol. 419, uitg. 1, ble. 556-565 ; Januarie 2012 ; arΧiv:1108.6221 ; Bibcode: 2012MNRAS.419..556C ; doi:10.1111/j.1365-2966.2011.19719.x ;

Eksterne skakels
This article is issued from Wikipedia. The text is licensed under Creative Commons - Attribution - Sharealike. Additional terms may apply for the media files.