Groot Moskee van Taza
Die Groot Moskee van Taza (Jamaa El-Kbir) is ’n moskee in Taza, Marokko. Dit is naby die Bab er-Rih ("Poort van die Winde") geleë.
| Groot Moskee van Taza | ||
.jpg.webp) | ||
| Ligging | Taza, Marokko | |
| Voltooi | 1172 | |
| Status | Aktief | |
| Spesifikasies | ||
| Minaret(te) | 1 | |
| Styl | Almohadies | |
Geskiedenis
Die Groot Moskee van Taza is in die tydperk ná 1142 deur sultan Abd al-Mu'min laat bou. Volgens die Kitab el Istibsar is die mure in 1172 voltooi. Die moskee is in 1292-1293 tydens die bewind van die Marinidiese dinastie vergroot. Die ou kieblamuur en die mihrab is afgebreek en die nuwe konstruksie het ’n koepel gekry.
Die gebou is een van die oudste oorblywende voorbeelde van die Almohadiese argitektuur. Dit is ook onder die publiek bekend vir sy groot kandelaar wat meer as 3 ton weeg.
Argitektuur
Die buitemure van die moskee, wat vroeër uit drie rigtings toeganklik was, is gebou volgens die stampgrond-tegnologie van die Berbers in die suide van Marokko. In teenstelling daarmee is die minaret van gebreekte klippe en bakstene gebou; dit staan in die noordwestehoek van die moskee. Bo-op is ’n lantern, soos wat die gebruik in Marokko was sedert die Almohadiese tydperk – ’n argitektoniese eienskap wat geskoei is op die antieke vuurtoring van Alexandrië.
Die moskee en minaret is nou wit en grootliks onversier.
Bronne
- Sanctuaires et fortresses almohades / H. Basset en Henri Terrasse, Collection "Hespéris" ; no 5, Parys, 1932
- Journal électronique tazacity / Adil Fahmi - Tazacity Geargiveer 27 Mei 2010 op Wayback Machine
Eksterne skakels
- Die Groot Moskee by mosquee.taza.fr – foto's en kommentaar (fr)
Hierdie artikel is vertaal uit die Engelse en die Duitse Wikipedia