Goue Akker

Die Goue Akker is 'n winkelsentrum op die hoek van Adderleystraat en Strandstraat in die middestad van Kaapstad. Dit is in die 1970’s deur Sanlam op die terrein van die oorspronklike spoorwegstasie gebou. In 1975 met opgrawings tydens die bouproses is op oorblyfsels afgekom van die noordelike punt van 'n opgaardam wat in 1663 hier op die oorspronklike kuslyn gebou is.

Goewerneur Zacharias Wagenaer was baie bekommerd oor die standhoudende voorsiening van skoon drinkwater aan die inwoners sowel as aan die verbygaande skepe. Hy het opdrag gegee dat 'n reghoekige gemesselde opgaardam, bekend as die Nieuwe Bak (ook soms as Wagenaer se tenk), tussen die Fort en die see gebou moes word. Soldate, tuiniers, slawe, seuns en dogters, dus almal, is aan die werk gesit om te grawe en die rotsbodem op te breek. Daarna het die klipmesselaars die mure en sluise voltooi. Na twee maande se werk kon die dam van 45 m lank, 15 m breed en 1½m diep gevul word met 700 000 liter water uit die Varsrivier. In 1671 het Wouter Mostert 'n kanaal van die dam na die kaai gebou. Dit was makliker vir die matrose om die vate by die skepe te vul as by die dam en dan nog die vate na die skepe te rol.

Die reste van die dam en kanaal word in die Goue Akker as historiese besienswaardighede beskerm.