Glen Grey

Glen Grey was die vroeëre naam van die landstreek rondom Lady Frere in die Oos-Kaap.

Na die Agtste Grensoorlog is die gebied oos van Queenstown en wes van die Indwerivier by die Kaapkolonie ingelyf. Die Temboes onder Nonesi (1815–1880), die dogter van Faku en hoofvrou van Ngubencuka, is hier gevestig en die streek het toe as Tamboekieland bekend geword. In 1852 is die Wesleyaanse sendeling J.C. Warner as goewermentskommissaris hier aangestel en is die streek herdoop tot Glen Grey. 'n Versoek van die owerheid dat die Tamboekies ooswaarts moet skuif na grond tussen die Indwerivier en die Groot-Keirivier is deur Nonesi en 'n groot aantal van haar volgelinge verwerp. Die regering van die Kaapkolonie se doel hiermee was om 'n groter blanke bevolking op die oosgrens te vestig.

Glen Grey was later onder die naam Cacadu 'n distrik van die Transkei. (Dit moet nie verwar word met die meer wesgeleë Cacadu-distriksmunisipaliteit nie.) Nou is dit bekend as die landdrosdistrik Lady Frere.

Glen Grey is soos die dorpe Greyton en Greytown vernoem na sir George Grey (1812–1898). Lady Grey dra die naam van sy vrou.

Die Glen Grey-wet van 1894 is vir die eerste maal hier toegepas.