Giant's Causeway

Die Giant's Causeway is 'n rotsformasie van vulkaniese oorsprong en een van die natuurwonders van Ierland, geleë langs die noordkus van die Noord-Ierse graafskap Antrim, sowat drie myl (4,8 km) noordoos van Bushmills en sowat 60 myl (100 km) noordwes van Belfast. Die formasie, wat sy ontstaan aan afkoelende lawastrome te danke het, bestaan uit sowat 40 000 simmetriese vertikale basaltkolomme met hoogtes van tot ses meter wat inmekaarpas soos 'n heuningkoek (en vind sy voortsetting anderkant die Ierse See in Skotland). Dit is deur Unesco in 1986 tot wêrelderfenisgebied verklaar. Binne die Verenigde Koninkryk het dit sedert 1987 die status van nasionale natuurreservaat.

Giant's Causeway and Causeway Coast*
Unesco-wêrelderfenisterrein
Giant's Causeway
Koördinate: 55°14′27″N 6°30′42″W
Lande	Verenigde Koninkryk
Tipe	Natuur
Kriteria	VII, VIII
Verwysings	369
Streek†	Europa
Inskripsiegeskiedenis
Inskripsie	1986  (10de sessie Sessie)
* Naam soos dit in die Wêrelderfenislys verskyn. † Streek soos deur Unesco geklassifiseer.

Giant's Causeway

Heksagonale basaltkolomme

Die grootste deel van die Giant's Causeway is tans in besit van die National Trust wat ook as bestuursliggaam optree en 'n besoekersentrum naby die rotsformasie opgerig het. Terwyl die Trust 'n toegangsgeld vra vir die sentrum, het die publiek gratis toegang tot die rotsformasie via 'n voetpad of per bus. Die res van die terrein is in staatsbesit as Crown Estate en in die besit van 'n aantal privaat grondeienaars.