George Crosland Robinson

George Crosland Robinson (Huddersfield, Yorkshire, Engeland, 27 Junie 1858 – Kaapstad, 19 Maart 1930) was ’n Suid-Afrikaanse kunsskilder van Britse herkoms.

Babylon's Tower, olie op bord, datum onbekend.

African woman holding a pot, olie op bord, datum onbekend.

Die Londense afslaer Bonhams het Robinson se Table Mountain (in werklikheid 'n toneel op Houtbaai) op 26 Oktober 2010 vir £540 verkoop.[1]

Robinson was die tweede seun van Henry Robinson en sy vrou, Sophia Crosland. Hy ontvang sy opleiding aan die kunsakademie in Dresden, Duitsland. In 1885 bring hy besoek aan Suid-Afrika en 10 jaar later vestig hy hom in Kaapstad. Hier word hy hoof van die Old Cape Town School of Art, wat die Roelandstraatskool, die eerste formele kunsskool in Suid-Afrika, opgevolg het. In 1902 word hy stigterslid van die Suid-Afrikaanse Genootskap van Kunstenaars en dien as voorsitter daarvan van 1904 tot 1907, en daarna weer van 1909 tot 1915. Hy was ook 'n bekende persoonlikheid in die kunskringe van Kaapstad en neem aktief deel aan die kulturele lewe. Hy teken onder meer sterk beswaar aan teen die sloping van historiese geboue en verleen kragdadige steun aan pogings om 'n Suid-Afrikaanse nasionale kunsmuseum in Kaapstad te laat oprig.

As kunstenaar het Robinson veral bekendheid met sy portrette van vooraanstaande Suid-Afrikaners verwerf. Die werke wat hy op die eerste uitstalling van die Suid-Afrikaanse Genootskap van Kunstenaars ten toon gestel het, is in 'n akademies-romantiese Victoriaanse styl geskilder. Sy sterk konserwatisme en neiging tot die romantiese het 'n kontras met die werk van die portretskilder Edward Roworth, wat hom in 1903 in Kaapstad gevestig het. Die mededinging van laasgenoemde het ook invloed op Robinson se kuns gehad. Hy het hom meer op landskapskildering in olie- sowel as in waterverf begin toelê. Aanvanklik was sy styl baie gedwonge en strak, maar mettertyd het sy tegniek vloeiender geword en selfs 'n mate van beïnvloeding deur Roworth getoon. Sy tekeninge was egter deurgaans meer spontaan. In 1905 is sy “Sonsopkoms, Gordonsbaai” in die Royal Academy uitgestal. Later het hy ook deelgeneem aan die Ryksuitstalling van Suid-Afrikaanse kuns in Wembley, Londen (1924–27). Ná sy dood is van sy werk ook vertoon by die uitstalling van die South African Academy in Johannesburg in 1953, op die Bulawayo se eeufeesuitstalling in 1953, en op die uitstalling van “Stigters van skilderkuns aan die Kaap” in 1957 in Kaapstad.

Van sy werk is in die besit van die Suid-Afrikaanse Nasionale Kunsmuseum in Kaapstad, die Africana-museum in Johannesburg en in die Albany-museum in Grahamstad.

Robinson het in sy tyd baie bygedra tot die ontwikkeling van die skilderkuns in Kaapstad. Sy skildertegniek en fundamentele benadering staan egter los van moderner rigtings soos die Franse Impressionisme. Hy is ná ’n jare lange vriendskap met die kunstenares Constance Penstone (gebore Jones) ná haar man se dood getroud. Hulle het nie kinders gehad nie. Ten tyde van sy dood in ’n tremongeluk was hy verloof aan Helena Lochner, wat Afrikaanse kinderboeke geskryf en, danksy Robinson se aanmoediging, ook geïllustreer het.