Georg Stegmann

Ds. Georg Wilhelm Stegmann (1814 - 14 Oktober 1890) was 'n leraar in die Lutherse Kerk en daarna in die Nederduitse Gereformeerde Kerk.

In die Lutherse kerk in Strandstraat het Stegmann as medeleraar gewerk.

Ds. Georg Wilhelm Stegmann, toe hy leraar van Glen Lynden was.

Dit was deur Stegmann se toedoen dat dié gebou, indertyd 'n uitgediende teater, aangekoop en in 'n kerk vir vrygestelde slawe omskep is. Vandag is dit die tuiste van die NG gemeente St. Stephen's.

Ds. Stegmann was van 1847 leraar van die Duitse Evangelies-Lutherse gemeente in Kaapstad, wie se Sint Martini-kerk in 1857 opgerig is en vandag nog aan die bopunt van Langstraat staan.

Stegmann het gestam uit 'n Duitse Kaapse familie. Hy ontvang sy teologiese opleiding in Aberdeen, Skotland, en aan die Lutherse seminarium in Amsterdam. Hy word in 1835 die tweede leraar van die Lutherse kerk in Strandstraat, Kaapstad. Sy dienste vanaf 1838 saam met 'n plaaslike Presbiteriaanse predikant aan vrygestelde slawe lei tot die aankoop van 'n ontruimde teater op Riebeeckplein as kerkgebou, die latere tuiste van die NG gemeente St. Stephen's.

Stegmann tree in 1847 uit diens van die Lutherse gemeente en was toe tegelykertyd in diens van twee gemeentes: St. Stephen's en die Duitse Evangelies-Lutherse gemeente St. Martini, wat hy saam met sy ondersteuners gestig het. Die Lutherse kerkgebou wat vandag nog aan die bopunt van Langstraat staan, is in 1857 vir laasgenoemde opgerig. Die sinode van die NG Kerk legitimeer hom in 1857. In 1859 aanvaar hy 'n beroep na die NG gemeente Glen Lynden op Adelaide en arbei daar tot hy in 1890 aftree.

Hy was 'n swaer van ds. Andrew Murray sr. Sy seun Georg Stegmann jr. was medeleraar van die NG gemeente Kaapstad van 1867 tot 1880. Nog 'n seun, eerw. J.F. Stegmann, was 40 jaar lank sendingpredikant op Pniel, tussen Stellenbosch en Franschhoek.