Gambiërivier
Die Gambiërivier (Engels: Gambia River, Frans: fleuve Gambie) is 'n belangrike rivier in Afrika wat oor 1 130 km vanaf die Fouta Djallon-plato in Noord-Guinee tot in die Atlantiese Oseaan vloei by die stad Banjul. Dit is bevaarbaar vir ongeveer die helfte van sy lengte.
Gambiërivier | |
---|---|
![]() Die westelike deel van die Gambiërivier, soos vanuit die ruimte gesien. | |
![]() Die stroomgebied van die Gambiërivier. | |
Oorsprong | naby Labé |
Monding | Banjul, Gambië Atlantiese Oseaan |
Stroomgebied | Guinee, Senegal, Gambië |
Lengte | 1 130 km (702 myl) |
Oorspronghoogte | 438 m (1 437 voet) |
Mondinghoogte | 0 m |
Gemiddelde afloop | 2 000 m/s³ (70 629 ft³/s) |
Stroomgebiedopp. | 69 931 km² (13 427 myl²) |
![]() Kaart van die Gambiërivier-bekken in Afrika. |
![](../I/River_gambia_Niokolokoba_National_Park.gif)
Die rivier is hoofsaaklik bekend as gevolg van Gambië, die kleinste land in Afrika, wat uit omtrent net die stroomafhelfte van die rivier en sy twee oewers bestaan.
Van Fouta Djallon loop die rivier noordwes in die Tambacounda provinsie van Senegal in waar dit deur die Parc National du Niokolo Koba vloei en die Nieri Ko en Koulountou daarby aansluit voor dit in Gambië invloei by Fatoto. Van hierdie punt af vloei die rivier hoofsaaklik wes, maar kronkelend met 'n aantal hoefystermere. Sowat 100 km van die monding begin dit geleidelik wyer word, tot meer as 10 km wyd waar dit by die see uitmond.
Volgens Alex Haley se roman Roots, het die Gambiërivier een van die leidrade verskaf wat hom gehelp het om sy Amerikaanse familiegeskiedenis terug te spoor na Afrika. Die woorde "Kamby Bolongo" was van die min woorde wat sy familie oor die geslagte heen aangegee het; hy ontdek dat 'n bolongo 'n "bewegende water" of "rivier" is in Mandinka, hy lei dus daaruit af dat die frase waarskynlik na die Gambiërivier verwys. Sy teorie is bevestig toe hy na Juffure, Gambië, op die noord-oewer van die rivier reis, en vind dat die mondelingse familiegeskiedenis ooreenkom met sy eie.
Langs die rivier naby Juffure is Jameseiland, 'n plek gebruik in die slawehandel wat nou 'n UNESCO Wêrelderfenisgebied is.
Eksterne skakels
Wikimedia Commons het meer media in die kategorie Gambiërivier.
- (en) Webwerf met inligting oor die Gambiërivier en die natuurlewe in die omgewing