GNU/Linux

GNU/Linux is die naam vir die bedryfstelsel wat bestaan uit programme van die GNU-projek en die Linux-kern. Hierdie is 'n effens omstrede naam aangesien hierdie stelsels gewoonlik slegs "Linux" genoem word, en die gesamentlike naam hoofsaaklik deur die GNU-projek en hulle ondersteuners aangemoedig word.

Die GNU-projek se doel om 'n volledig vrye bedryfstelsel te skep het eers moontlik geword met die eerste vrye kern, Linux, wat in die 1990's beskikbaar geword het. GNU is 'n projek van die Stigting vir Vrye Sagteware en Linux is (aanvanklik) deur Linus Torvalds geskryf. Aangesien GNU en Linux geen amptelike verbintenis het nie, en Linux nie 'n bedryfstelsel is nie, maar bloot 'n kern, het die stigting aangedui dat dit nie heeltemal korrek is om die gesamentlike stelsel bloot "Linux" te noem nie.

Richard Stallman, die stigter van die stigting, is al hiervoor gekritiseer, maar hou vol dat Linux slegs een deel van die volledige stelsel is, en dat die volledige naam mense sal herinner aan die ideologiese redes vir die ontstaan van die GNU-projek, naamlik dié van Vrye Sagteware. Linus Torvalds het al aangedui dat die gesamentlike naam geregverdig is as die GNU-projek 'n Linux-verspreiding sou maak (dus GNU/Linux net soos Redhat Linux), maar meen dat om die gesamentlike naam in die algemeen te gebruik "belaglik" is.

Alhoewel die gesamentlike stelsels gereeld slegs "Linux" genoem word, word die volledige naam wel soms gebruik, veral deur die Debian-projek.

'n Linux-verspreiding (Engels: distribution) is die algemene manier waarop 'n GNU/Linux-stelsel beskikbaar gestel word. 'n Tipiese verspreiding sal veel meer programme as bloot dié van die GNU-projek insluit. Dit is 'n verdere rede waarom die gesamentlike naam dalk nooit algemeen aanvaar sal word nie.