Friedrichstraße

Friedrichstraße is een van die bekendste strate in die middestad van Berlyn wat oor 'n afstand van 3,3 km deur die stadsdele Mitte en Kreuzberg loop. Dit is genoem na keurvors Friedrich III van Brandenburg wat tussen 1688 en 1713 regeer het en as Friedrich I vanaf 1701 ook as koning oor Pruise geheers het. Oorspronklik was dit die langste straat in Berlyn.

Uitsig oor Friedrichstraße in 'n suidelike rigting

"Hangende tuin" in die KulturKaufhaus Dussmann

Die "glastregter" is die sentrale argitektoniese element van die Franse afdelingswinkel Galeries Lafayette

Die revue-teater Friedrichstadt-Palast is in 1984 in die destydse DDR-hoofstad geopen

Friedrichstraße is die Berlynse buurt Friedrichstadt se hoofstraat wat in 'n noord-suidelike rigting vanuit die plein Mehringplatz in Kreuzberg oor die vroeëre geallieerde grenspos Checkpoint Charlie en die pragstraat Unter den Linden, verby Friedrichstraße-stasie en die Tränenpalast loop. Op die Weidendammer-brug loop dit oor die Spreerivier en by sy noordelike eindpunt, die Oranienburger Tor ('n kruising van Hannoversche Straße met Torstraße) in die Dorotheenstraße (met sy bekende begraafplaas Dorotheenstädtischer Friedhof en die Bertolt Brecht-huis) in.

Met enkele uitsonderings is alle historiese geboue tydens die bomaanvalle van die Tweede Wêreldoorlog vernietig. In die laaste jare van die Duitse Demokratiese Republiek is in die gebied tussen Leipziger Straße en Unter den Linden met boubedrywighede vir 'n aantal luukse sakegeboue begin wat enkele jare ná die Duitse hereniging in 1996 voltooi is. Hier het onder meer sogenaamde Quartiere (straatblokke) ontstaan wat luukse winkels soos die Berlynse filiaal van die Franse afdelingswinkel Galeries Lafayette, eksklusiewe modewinkels en vertoonsale van motorvervaardigers soos Volkswagen en Opel huisves. Ander bekende winkels sluit die KulturKaufhaus Dussmann ('n reuse-winkel wat boeke en ander media verkoop, met Europa se grootste afdeling vir klassieke musiek) en 'n filiaal van die boeke-kettingwinkel Hugendubel in.

Verder noord is die Maritim proArt Hotel Berlin, die Internasionale Handelsentrum ('n kantoorgebou met 24 verdiepings wat in 1978 opgerig is) en die Friedrichstraße-stasie geleë. Hierdie gekombineerde trein- en stadstreinstasie was vroeër 'n belangrike grensstasie tussen Wes- en Oos-Berlyn wat as Tränenpalast ("Tranepaleis") bekend gestaan het. Agter die stasie is die Admiralspalast (wat tussen 1955 en 1997 as Metropol-Theater bekendheid verwerf het) en die Friedrichstadtpalast-teater asook die tuin van die Kunsthaus Tacheles geleë.