Fred Turner Museum

Die Fred Turner Museum (ook bekend as die Windpompmuseum) is ‘n kultuur-historiese museum in Loeriesfontein. Dit gee ‘n beeld van die lewe van die trekboerpioniers van die 19de eeu in die Hantam en Boesmanland deur die uitstalling van ‘n wa en bybehorende tente, ‘n kookskerm met kombuisgereedskap, bybels, klere, ‘n perdemeul, ens. Veral opvallend is die 27 windpompe wat al die fabrikate verteenwoordig wat deur die jare in hierdie afgeleë kontrei op die plase gebruik is.

Die museum dra die naam van die eienaar van die handelspos waarom die dorp ontwikkel het. Dr. James Walton, ‘n kultuurhistorikus van Kaapstad, het die gemeenskap aangemoedig om so ‘n museum hier te stig. Gezina Louw, die vrou van Eli Louw, het die inisiatief geneem met die versamel van die oudhede en die stigting van die museum.