Franco Zeffirelli

	Franco Zeffirelli
	; Franco Zeffirelli in 2008
	Senaatslid van die Italiaanse Republiek
	Ampstermyn; 21 April 1994 – 29 Mei 2001
Persoonlike besonderhede
Gebore	Gian Franco Corsi Zeffirelli; 12 Februarie 1923 ; Florence, Toskane, Italië
Sterf	15 Junie 2019 (op 96); Rome, Italië
Politieke party	Christelik-Demokraties (tot 1994); Forza Italia (1994–2001)
Kiesafdeling	Catania
Alma mater	Akademie vir Beeldende Kunste ín Florence
Religie	Rooms-Katolieke Kerk
Militêre Diens
Diens/Tak	Britse Weermag
Jare in diens	1942–1945
Rang	24ste Infanteriebrigade
Oorloë/Veldslae	Tweede Wêreldoorlog

Gian Franco Corsi Zeffirelli, KBE, Grande Ufficiale OMRI ([ˈfraŋko dzeffiˈrɛlli]; * 12 Februarie 1923 in Florence; † 15 Junie 2019 in Rome), beter bekend as Franco Zeffirelli, was 'n Italiaanse regisseur en vervaardiger wat in drie genres – operas, rolprente en televisie – tuisgevoel en hier groot sukses met sy dikwels opulente werke behaal het. Zeffirelli het sy reputasie as meesterregisseur veral met Shakespeare-werke behaal wat hy vir die silwerdoek bewerk het.

In Romeo and Juliet (1967/68), wat met 'n internasionale span in Engels vervaardig is, het hy die twee hoofrolle deur sestienjarige akteurs laat vertolk, Leonard Whiting en Olivia Hussey, wat dus so oud was soos die karakters in Shakespeare se toneelstuk Romeo and Juliet. Zeffirelli is vir 'n Oscar genomineer. Vir die verfilming van The Taming of the Shrew het hy in 1967 met Elizabeth Taylor en Richard Burton saamgewerk, terwyl Mel Gibson in 1990 Hamlet (Amleto) vertolk het.

Vir die lewensverhaal van Jesus van Nasaret het Zeffirelli in 1977 'n televisiereeks met ses aflewerings vervaardig. As operaregisseur was Zeffirelli verbonde aan befaamde operahuise soos die Milaanse Scala, die Comédie-Française en New York se Metropolitan Opera. Van die mees gesofistikeerde kostuums het hy self ontwerp. Hy het 'n aantal jare met die operasangeres Maria Callas saamgewerk. Haar laaste lewensjaar staan sentraal in die rolprent Callas Forever wat in 2002 ontstaan en waarin Fanny Ardant die hoofrol vertolk het. In een van sy laaste groot rolprente, Un tè con Mussolini (Tea with Mussolini), wat in 1999 ontstaan het, is enkele outobiografiese trekke herkenbaar. Die gunstelingrol, wat hy in sy privaat lewe met groot passie gespeel het, was dié van swierbol en kettingroker.

Politieke loopbaan

Tussen 1994 en 2001 was Franco Zeffirelli 'n lid van die Italiaanse Senaat vir die kiesafdeling Catania – as afgevaardigde van Silvio Berlusconi se party Forza Italia.

Afsterwe

Franco Zeffirelli se seun Luciano het die wêreld op 15 Junie 2019 meegedeel dat sy pa in vrede heengegaan het. Die Franco Zeffirelli-stigting het op sy webtuiste afskeid geneem met twee woorde – Ciao Maestro.[1] Franco Zeffirelli, wat in 1997 vrymoedig oor sy homoseksualiteit gesels het en die Rooms-Katolieke Kerk se standpunt daaroor gedeel het, word oorleef deur twee seuns wat hy aangeneem het.

Verwysings

Deutsche Welle – Kino, 15 Junie 2019: Zwischen Shakespeare und Berlusconi: Regisseur Franco Zeffirelli gestorben. Besoek op 15 Junie 2019

Eksterne skakels

(en) Franco Zeffirelli in die Internet-rolprentdatabasis
(en) Franco Zeffirelli in die Internet-Broadway-databasis

This article is issued from Wikipedia. The text is licensed under Creative Commons - Attribution - Sharealike. Additional terms may apply for the media files.

[1] Deutsche Welle – Kino, 15 Junie 2019: Zwischen Shakespeare und Berlusconi: Regisseur Franco Zeffirelli gestorben. Besoek op 15 Junie 2019