Florence Nightingale

Florence Nightingale (12 Mei 1820 – 13 Augustus 1910) was 'n Britse verpleegster en statistikus.

Die dame met die lamp

Florence Nightingale
Gebore	12 Mei 1820 Florence, Groothertogdom Toskane
Sterf	13 Augustus 1910 (op 90) Park Lane, Londen, Engeland, Verenigde Koninkryk
Nasionaliteit	Verenigde Koninkryk
Beroep	Verpleegster en statistikus
Bekend vir	baanbrekerswerk in moderne verpleging tydens die Krimoorlog
Handtekening

As 'n intelligente en goed opgeleide dogter van welgestelde Engelse aristokrate, was daar verwag dat Florence haar lewe in die kringe van die rykes sou deurbring.

Na 'n onverwagte konfrontasie met armoede en siekte onder politieke vlugtelinge in Genève, Switserland, het sy besluit om haar rug op haar aristokratiese lewe te keer en te fokus op die verpleging van siekes en gewondes. Florence Nightingale was die eerste verpleegster wat wetenskaplike status aan die verpleegberoep besorg het.

Sy het veral bekendheid verwerf gedurende die Krimoorlog, toe sy as die "vrou met die lamp" bekend gestaan het. Na die oorlog het sy baie belangrike werk gedoen om verpleging as beroep te bevorder. Florence Nightingale is op 12 Mei 1820 in Florence, Italië, gebore en was die tweede dogter van welgestelde ouers.

Sy het haar kinderjare in Derbyshire, Hampshire en Londen, Engeland deurgebring, en haar onderwys hoofsaaklik van haar vader ontvang. Sy het geglo dat God op 7 Februarie 1837 met haar gepraat het en dat Hy haar tot ʼn spesiale taak geroep het.

Toe sy aan haar ouers vertel dat sy verpleegster wou word, wou hulle haar nie toelaat nie, omdat die verpleegberoep in daardie dae nie as 'n beroep vir iemand uit 'n welgestelde huis beskou is nie.

Die verpleegsters het destyds nie behoorlike, wetenskaplike opleiding ontvang nie en die beroep het haas geen status gehad nie. Ondanks sterk verset van haar familie, het Florence daarin geslaag om haarself self op te lei in die gebied van verpleging.

Sy het in hospitale in Duitsland en Frankryk gewerk voor sy haar bemoei het met die herorganisasie van 'n klein hospitaal in Londen. Dit is egter veral vir haar werk tydens die Krimoorlog wat sy bekend geword het as die Lady with the Lamp ("dame met die lamp"): 'n bynaam wat die soldate haar gegee het omdat sy snags deur die sale sou loop met 'n klein brandende petroleumlampie om elke soldaat te besoek.

Florence het ook 'n aanleg vir wiskunde gehad en het die beginsels van statistiek by verpleegkunde ingevoer. Sy is die eerste vrou wat in die Royal Statistical Society opgeneem is en het later ook 'n erelidmaatskap in die American Statistical Association gekry.

Florence Nightingale het haar onmiddellik as vrywillige verpleegster aangemeld, en op 5 November 1854 het sy met ʼn span verpleegsters by die militêre hospitaal in Scutari aangekom. Die toestande in die militêre hospitaal was haglik. Die gewonde soldate se klere is nooit gewas nie, rotte en vlooie het vryelik voorgekom en mediese voorrade was skaars. Sy het onverwyld daarvan werk gemaak om die higiëne in die hospitaal en van die pasiënte te verbeter.

Na 6 maande is sy na die militêre hospitaal in Balaklawa, waar sy Krimkoors gekry het wat byna haar lewe geëis het. Daarna is sy terug na Scutari, waar sy tot aan die einde van die oorlog in 1856 gewerk hel. By haar terugkeer in Londen het sy geweier om enige eer vir haar goeie werk gedurende die Krimoorlog te ontvang.

Sy het haar onmiddellik beywer vir die verbetering van hospitaal toestande vir die Britse soldate. Hoewel sy sedert 1857 'n invalide was, het sy onverpoos voortgewerk uit haar huis in Londen. In 1860 het sy met die Nightingale-fonds van 45 000 pond die Nightingale School for Nurses by die St. Thomas's Hospital in Londen opgerig. Sy het ook heelwat geskryf oor verpleging as beroep, higiëne in die hospitaal, ensovoorts. Van 1901 af was Florence Nightingale heeltemal blind.

In 1907 was sy die eerste vrou wat die Order of Merit ontvang het. Op 13 Augustus 1910 is sy oorlede en in die familiebegraafplaas by Hampshire begrawe.

Florence Nightingale word vandag as die grondlegger van moderne verpleegkunde beskou en die Internasionale Dag vir Verpleegsters word tans op haar geboortedag gevier.