Falkland-paleis
Falkland-paleis (Engels: Falkland Palace) in Fife, Skotland, is ’n voormalige koninklike paleis van die Skotse monarge. Dit is vandag ’n toeriste-attraksie.[1]
Geskiedenis
Die Skotse koningshuis het Falkland-kasteel in die 14de eeu gekoop. Tussen 1501 en 1541 het Jakobus IV en Jakobus V die ou kasteel in ’n pragtige paleis omskep en die tuin laat verbeter. Falkland met sy groot woude was daarna ’n gewilde rusplek vir al die Stewart-monarge.
Ná die vereniging van die Engelse en die Skotse kroon het Jakobus VI en I, Karel I en Karel II almal Falkland besoek. Oliver Cromwell se leër het die paleis aan die brand gesteek tydens hul inval in Skotland, en dit het toe verwaarloos geraak. In 1887 het John Crichton-Stuart, die 3de Markies van Bute, herstelwerk aan die paleis laat doen.
Die Crichton-Stuarts, die opsigters van die paleis, het die Nasionale Trust van Skotland in die vroeë 1950's aangestel om die paleis te versorg. Die trust hou nou die paleis en tuin in stand.
Beskrywing
Die paleis het twee vleuels wat in ’n L-vorm geleë is en wat die suidelike en oostelike vleuels genoem word. Die binnehof word bereik deur die hekhuis aan die westekant van die suidelike vleuel. Oos van die kapel is daar ’n klein reghoekige toring wat aavanklik ’n ronde trap gehuisves het.
Die oostelike vleuel, buiten die binnehof-fasade, is ’n ruïne. In die sentrale toring, die Crosshouse, is die koning en koningin se slaapkamers herskep. Die suidelike en oostelike binnehof-fasades is tussen 1537 en 1542 versier met pilare in die Franse renaissance-styl. Die plafon van die kapel dateer van die tyd van Jakobus V en is in 1633 herversier vir die besoek van Karel I.
Verwysings
Eksterne skakels
- Rampant Scotland
- Undiscovered Scotland
Wikimedia Commons het meer media in die kategorie Falkland-paleis.
Hierdie artikel is vertaal uit die Engelse Wikipedia
Normdata  |
|---|