Europa-toring

Die Europa-toring (Litaus: Europos bokštas) in die Litause hoofstad Vilnius is met 33 verdiepings en 'n hoogte van 148 meter tans die hoogste wolkekrabber in die Baltiese lande. Die gebou is volgens 'n ontwerp van die plaaslike argitekteburo Audrius Ambrasas Architects Company vanaf die jaar 2002 as deel van die kantoor- en winkelkompleks Europa Square (Europos aikštė) in Šnipiškės, die nuwe sakesentrum van Vilnius, opgerig en op 1 Mei 2004 tydens die feesvierings ter geleentheid van Litaue se toetreding tot die Europese Unie amptelik ingewy.

Europa-toring Europos bokštas
Die Europa-toring
Amptelike hoogte	148 m
Verdiepings	33
Stad	Vilnius, Litaue
Opgerig	2002 tot 2004
Argitek	Audrius Abramsas

Die projek was aanvanklik vanweë sy hoogte omstrede – kritici het daarop gewys dat die wolkekrabber die stadshorison van Vilnius se historiese stadskern dramaties sou verander, veral nadat die oorspronklike ontwerp gewysig en drie bykomende verdiepings by die gebou gevoeg is. Tans maak die Europa-toring, wat in 2004 as een van die beste nuwe wolkekrabbers vir die Emporis Skyscraper Award genomineer is,[1] deel uit van 'n reeks wolkekrabbers wat die nuwe stadshorison van Vilnius vorm. Die uitkykplatform op die 31ste verdieping is op Sondae gratis toeganklik vir die publiek.