Ereksie

’n Ereksie is ’n fisiologiese verskynsel van die manlike geslagsorgaan by baie diersoorte waar die penis stywer en groter word deur opswelling.

’n Saamgestelde foto wat die verskillende stadiums van ’n menslike ereksie wys.

Agtergrond

’n Ereksie is die resultaat van ’n ingewikkelde interaksie van psigiese, neurologiese, vaskulêre en endokriene faktore. Dit hang meestal, maar nie uitsluitlik nie, saam met seksuele opwinding of aantrekking. Fisiologies word ’n ereksie veroorsaak deur die parasimpatiese deel van die outonome senustelsel en dit is dus nie heeltemal onder bewuste beheer nie. Wanneer ’n ereksie plaasvind, verslap die spierweefsels in die toevoerende aar sodat die penis se sponsagtige weefsel met meer bloed gevul word. Terselfdertyd vernou die afvoerende aar en die bloed bly dus in die penis "gevange". Die gevolg is dat die penis opswel, hard word en oplig, en gereed is vir geslagsgemeenskap. ’n Ereksie verdwyn wanneer die omgekeerde proses plaasvind, gewoonlik ná ejakulasie.

Die vorm, hoek en rigting van ’n menslike ereksie kan grootliks van man tot man verskil. ’n Penis wat gedeeltelik styf is, maar nie heeltemal nie, word soms ’n semi-ereksie genoem en een wat nie styf is nie, word gewoonlik slap genoem.

Sosio-seksuele aspekte

Sosiaal

’n Ereksie is ’n algemene aanduiding van seksuele opwinding en is noodsaaklik vir penetrasie tydens seks.

Ereksies is ook algemeen by jong seuns en babas, en kan selfs voor geboorte plaasvind.[1] Ná puberteit kom ereksies gereelder voor.[2] ’n Ongewone afkeer van die erekte penis word soms fallofobie genoem.[3]

Spontane ereksies
’n Stywe, onbesnyde menslike penis waarvan die voorhuid teruggetrek is.

Spontane of onwillekeurige ereksies is algemeen en ’n normale deel van die menslike fisiologie. In ’n sosiale konteks kan so ’n ereksie in die openbaar of op die verkeerde tyd ’n man in die verleentheid stel.[2] Ereksies kan op enige tyd van die dag spontaan voorkom en kan onder klere ’n opvallende "knop" veroorsaak wat weggesteek kan word deur stywe onderklere, ’n lang hemp of losser klere te dra.[4]

Grootte

Die lengte van ’n slap penis stem nie noodwendig ooreen met dié van die penis wanneer dit styf is nie; sommige klein slap penisse kan baie langer word as ’n ereksie plaasvind, terwyl ander minder groei.[5]

Die penis is ná puberteit gewoonlik ’n vasgestelde grootte. Dit kan deur chirurgie vergroot word,[6] hoewel penisvergrotings omstrede is en baie mans ná die tyd "nie tevrede" met die resultate is nie, volgens een studie.[7]

Met betrekking tot die grootte van die gemiddelde menslike penis het ’n studie met 15 521 mans, wie se penis deur professionele mense gemeet is en nie deur die mans self nie, tot die gevolgtrekking gekom die gemiddelde lengte van ’n stywe menslike penis is 13,12 cm (5,17 duim) en die gemiddelde omtrek 11,66 cm (4,59 duim).[8]

Rigting

Hoewel baie stywe penisse na bo wys, is dit algemeen en normaal dat die penis feitlik vertikaal op of af of reguit horisontaal wys; dit hang alles af van die spanning van die draagligament wat dit in posisie hou. ’n Ereksie kan ook verskeie vorms aanneem, van ’n reguit buis tot ’n buis wat boontoe, ondertoe, links of regs buig. ’n Groot kromming kan dui op Peyronie se siekte – die siekte kan ook fisiologiese of sielkundige gevolge hê, soos erektiele disfunksie of pyn tydens ’n ereksie.

Die volgende tabel wys hoe algemeen verskillende ereksiehoeke by staande mans is. In die tabel beteken 0° die penis wys reg boontoe en lê teen die maag, 90° is horisontaal en reg vorentoe, en 180° is reguit af na die voete. ’n Hoek na bo is die algemeenste.

Voorkoms van ereksiehoeke[9]
Hoek (°) Persentasie van mans
0-30 5
30-60 30
60-85 31
85-95 10
95-120 20
120-180 5

Verwysings
  1. erections in babies. Besoek op 11 Februarie 2012
  2. Lynda Madaras (8 Junie 2007). What's Happening to My Body? Book for Boys: hersiene uitg. Newmarket Press. p. 119. ISBN 978-1-55704-769-4. Besoek op 22 Julie 2013.
  3. Goldblatt, Howard (1990). Worlds Apart: Recent Chinese Writing and Its Audiences. p. 56.
  4. Sarah Attwood (15 Mei 2008). Making Sense of Sex: A Forthright Guide to Puberty, Sex and Relationships for People with Asperger's Syndrome. Jessica Kingsley Publishers. p. 62. ISBN 978-1-84642-797-8. Besoek op 22 Julie 2013.
  5. "Penis Size FAQ & Bibliography" (in Engels). Kinsey Institute. 2009. Geargiveer vanaf die oorspronklike op 7 Mei 2016. Besoek op 7 November 2013.
  6. Li CY, Kayes O, Kell PD, Christopher N, Minhas S, Ralph DJ (2006). "Penile suspensory ligament division for penile augmentation: indications and results". Eur. Urol. 49 (4): 729–733. doi:10.1016/j.eururo.2006.01.020. PMID 16473458.
  7. "Most Men Unsatisfied With Penis Enlargement Results" (in Engels). Fox News. 16 Februarie 2006. Geargiveer vanaf die oorspronklike op 29 Januarie 2015. Besoek op 17 Augustus 2008.
  8. "Is Your Penis Normal? There's a Chart for That - RealClearScience" (in Engels). Geargiveer vanaf die oorspronklike op 24 Mei 2020.
  9. Sparling J (1997). "Penile erections: shape, angle, and length". Journal of Sex & Marital Therapy. 23 (3): 195–207. doi:10.1080/00926239708403924. PMID 9292834.

Eksterne skakels
This article is issued from Wikipedia. The text is licensed under Creative Commons - Attribution - Sharealike. Additional terms may apply for the media files.