Emirates

Emirates Airlines Limited (Arabies: طيران الإمارات DMG: Ṭayarān Al- Imārāt) (IATA: EK, ICAO: UAE) is 'n lugredery gebaseer in Doebai, Verenigde Arabiese Emirate. Die lugredery is 'n filiaal van die Emirates Groep, wat geheel en al deur die regering van Doebai se "Investment Corporation of Dubai" besit word.[4] Dit is die grootste lugredery in die Midde-Ooste, wat byna 3 600 vlugte per week bedryf[5][6] van sy middelpunt by Doebai Internasionale Lughawe, na meer as 150 stede in 80 lande regoor ses vastelande.[7][8] Vragverskeping word onderneem deur die Emirates Groep se "Emirates SkyCargo"-afdeling.[9]

Emirates Airline

IATA ICAO Roepteken EK UAE EMIRATES
Gestig	1985 (1985)
Eerste vlug	25 Oktober 1985
Hoofspille	Doebai Internasionale Lughawe
Lojaliteitsprogram	Emirates Skywards
Subsidiêre	Arabian Adventures Congress Solutions International Emirates Holidays Emirates Tours
Vlootgrootte	264[1] + 11 vrag
Bestemmings	133[2]
Houermaatskappy	Die Emirates-groep
Sitkamer	Emirates Lounge
Hoofkantoor	Garhoud, Doebai, V.A.E.
Sleutelpersone	Ahmed bin Saeed Al Maktoum (Voorsitter en H.U.B.) Tim Clark (President)
Omset	VS$ 32,6 miljard (Maart 2023)[3]
Netto inkomste	VS$ 3,2 miljard (Maart 2023)[3]
Werknemers	102 379 (Maart 2023)[2]
Webwerf	http://www.emirates.com/

Een van Emirates se 119 Airbus A380's

'n Emirates Boeing 777-200LR land op George Bush Interkontinentale Lughawe in Houston.

Die lugredery is in die geledere van die top 5 wêreldwyd in terme van kilometers gevlieg, en is die grootste lugredery in die Midde-Ooste wat betref inkomste, vlootgrootte en passasiers gekarwei in 2018.[10] In 2018 was die lugredery die vierde grootste lugredery ter wêreld in terme van internasionale passasiers vervoer [11] en geskeduleerde passasierskilometers gevlieg.[12] Die redery was die tweede grootste in terme van geskeduleerde vrag ton-kilometers gevlieg.[13] Die maatskappy bedryf ook vier van die wêreld se langste direkte kommersiële vlugte van Doebai na Los Angeles, San Francisco, Dallas/Fort Worth, en Houston.[14][15]

Gedurende die middel-1980's het Gulf Air begin om sy dienste na Doebai af te skaal. As gevolg hiervan is Emirates op die been gebring in Maart 1985 met steun van Doebai se koninklike familie, met Pakistan International Airlines wat twee van die lugredery se eerste vliegtuie op 'n volhuurkontrak verskaf het. Dit was nodig om onafhanklik te funksioneer van regeringsubsidies, afgesien van $10 miljoen wat in aanvangskapitaal voorgeskiet is. Die redery het ontstaan onder leiding van Ahmed bin Saeed Al Maktoum, steeds die huidige voorsitter. In die jare na sy stigting het die lugredery sterk uitgebrei in beide sy vloot en bestemmings. In Oktober 2008 skuif Emirates al sy operasies by Doebai Internasionale Lughawe na Terminaal 3 om sy vinnige uitbreiding en groeiplanne vol te hou.[16]

Emirates besit 'n groot vloot Airbus en Boeing wyerompvliegtuie en is een van 'n paar rederye wat slegs 'n wyerompvloot bedryf, die staatmaker hier is die Boeing 777-300ER. Emirates het die tweede operateur van die Airbus A380 geword na Singapore Airlines. Hulle het ook die laaste eksemplaar A380 aangekoop voordat die model gestaak is. Emirates is 'n toonaangewende aankoper van vliegtuie, hy bekom nog 200 nuwe vliegtuie slegs in 2013.[17]

Emirates het 'n sterk handelsnaam as 'n leier in die lugvaartbedryf, veral in terme van uitstekende diens en sy baie vinnige groei, tesame met volgehoue winsgewendheid. Emirates het verskeie toekennings gewen – dit was in die agtste posisie geplaas deur Air Transport World vir "Lugredery van die Jaar" in 2012. Die toekenning is gedoen op grond van die erkenning van sy verbintenis tot veiligheid en operasionele uitmuntendheid, kliëntediens, finansiële gesondheid, insluitend 'n 25-jaar agtereenvolgende jaarlikse wins.[18] Emirates is aangewys as 'n viersterlugredery deur die lugvaartkonsultantgroep Skytrax. Die lugredery is bekroon as "Lugredery van die Jaar" in 2013.[19]