Eichsfeld
Die Eichsfeld [ˈaɪksfɛlt][1] is 'n historiese landskap in die noordooste van die Duitse deelstaat Nedersakse, die noordweste van Thüringen en die noordooste van Hesse tussen die Harz-bergreeks en die Werra-rivier. Die grootste nedersettings in die Eichsfeld is die stede Dingelstädt, Duderstadt, die herstellingsoord Heiligenstadt en Leinefelde-Worbis asook die dorp Gieboldehausen.
Die administratiewe distrik Eichsfeld het sy naam aan die landskap ontleen, alhoewel net 'n deel van die nedersettings in die historiese Eichsfeld binne die distriksgrense geleë is en ook dele van ander landskappe by dié distrik ingesluit is.
Die Eichsfeld het as deel van die Vorsbisdom Mainz eeue lank soos 'n eiland te midde van 'n merendeels Protestantse gebied geleë. Die sogenaamde Mainzer Rad as deel van die plaaslike wapen verwys nog steeds na hierdie politieke en godsdienstige status wat 'n besondere karakter aan die landskap gegee het. So het die Eichsfeld ook ná die Reformasie Rooms-Katoliek gebly en het sy identiteit in die gemeenskaplike geloof en tradisies gevind.
Die kerklike lewe is ook nie deur die politieke ontwikkeling ná die Tweede Wêreldoorlog geraak nie toe groot dele van die Eichsfeld deel uitgemaak het van die Duitse Demokratiese Republiek (DDR). Dit was die grootste streek in die DDR met 'n oorwegend Rooms-Katolieke bevolking. Die persentasie gereelde kerkgangers is steeds bo die gemiddelde van Duitsland. Sint Martin van Tours is die tradisionele beskermheilige van die Eichsfeld. Die Eichsfeldlied is die nie-amptelike volkslied van die streek.
Die plaaslike kookkuns het met sy wors-, tert- en ander spesialiteite bekendheid buite die grense van die landskap verwerf.
Verwysings
- Sparkasse Duderstadt (red.), Hans-Heinrich Ebeling en Maria Hauff (bew.): Duderstadt und das Untereichsfeld. Lexikon einer Landschaft in Südniedersachsen. Duderstadt: Mecke Druck 1996, bl. 287-290, ISBN 3-923453-85-X
