Edelhert-grotmense

Die Edelhert-grotmense is die mees onlangse prehistoriese bevolking wat nie soos moderne mense lyk nie. Fossiele van tussen 14 500 en 11 500 jaar oud is in die Edelhert- en die Longlin-grot in China ontdek. Hulle het ’n mengsel eienskappe van archaïese en moderne mense en daar is aanvanklik geglo hulle is ’n aparte menslike spesie wat uitgesterf het voordat hulle tot die geenpoel van die moderne mens kon bydra.[1]

Edelhert-grotmense
Tydperk: Laat Pleistoseen,
0.0145–0.0115 m. jaar gelede
↓
’n Gerekonstrueerde skedel (links bo) met skedelstukke.
Longlin 1, ’n gedeeltelike skedel.
Wetenskaplike klassifikasie
Koninkryk:
Animalia
Filum:
Chordata
Klas:
Mammalia
Orde:
Primates
Familie:
Hominidae
Tribus:
Hominini
Genus:
Homo
Spesie:
Onbepaal

Daar is bewyse van groot herte wat in die grot gaargemaak is, vandaar die naam.[2]

Ontdekking

In 1979 is die gedeeltelike skedel van ’n grotbewoner in die Longlin-grot in die Guangxi Zhuang-streek van Cina ontdek. Nog menslike oorblyfsels is daarna in die Maludong-grot (Edelhert-grot) in die provinsie Yunnan gevind. Laasgenoemde se ouderdom is met radiokoolstofdatering geraam op tussen 14 500 en 11 500 jaar. Daar word geglo alle ander prehistoriese menslike spesies soos die Neanderdallers was uitgesterf teen die tyd dat die Edelhert-grotmense geleef het. Hulle sal dus meer onlangse mense gewees het as Homo floresiensis (van sowat 13 000 jaar gelede).[3]

Anatomie

Ondanks hul relatief jong ouderdom toon die fossiele eienskappe van meer primitiewe mense. Hulle het anders as moderne mense plat gesigte, breë neuse, uitstekende kakebene sonder ’n ken, groot kiestande, prominente wenkbroubene, dik skedelbene en ’n brein van gemiddelde grootte gehad.[3]

Status

Ondanks hul kenmerkende eienskappe is die wetenskaplikes wat hulle ontdek het teensinnig om hulle as ’n nuwe spesie te klassifiseer.[3] Hulle kon dalk die produk van verbastering tussen Denisova-hominiene en moderne mense gewees het.[2] Sommige wetenskaplikes glo die verskille is binne die verwagte variasies tussen menslike bevolkings.[3]

DNS kon nog nie uit die fossiele onttrek word nie, maar pogings duur voort. Eers dan sal dit moontlik wees om die verwantskap tussen hulle en ander moderne mense te bepaal.[3]

Verwysings
  1. Deborah Smith (15 Maart 2012). "Scientists stumped by prehistoric human whose face doesn't fit". Brisbane Times (in Engels). Geargiveer vanaf die oorspronklike op 9 Oktober 2019.
  2. Barras, Colin (14 Maart 2012). "Chinese human fossils unlike any known species" (in Engels). New Scientist. Geargiveer vanaf die oorspronklike op 2 Julie 2015. Besoek op 15 Maart 2012.
  3. James Owen (14 Maart 2012). "Cave Fossil Find: New Human Species or "Nothing Extraordinary"?". National Geographic News (in Engels). Geargiveer vanaf die oorspronklike op 9 Mei 2019.
This article is issued from Wikipedia. The text is licensed under Creative Commons - Attribution - Sharealike. Additional terms may apply for the media files.