Duitsers

Die Duitsers (Duits: Deutsche) is 'n Germaanse nasie en etniese groep inheems aan Sentraal-Europa[63] wat 'n gemeenskaplike Duitse afkoms, kultuur en geskiedenis deel, en Duits as moedertaal praat. Alternatiewelik is Duitsers diegene wat in Duitsland woon of in Duitsland gebore is.[64] Volgens die grondwet van Duitsland is diegene wat oor die Duitse burgerskap beskik, 'n Duitser, ongeag van die etniese herkoms.[65]

Hierdie artikel handel oor die etniese groep. Vir die taal, sien Duits.

Duitsers
Totale bevolking:	ca. 100–150 miljoen[1]
Belangrike bevolkings  in:	Duitsland 74–75 miljoen[2][3][4]  Verenigde State 47 miljoen[5][6]  Brasilië 20 miljoen[7][8][9]  Argentinië 3,5 miljoen[10][11]  Kanada 3,2 miljoen[12]  Suid-Afrika 1,2 miljoen[13][14]  Frankryk 1,1 miljoen[15][16][17][18]  Australië 898 700[19]  Nederland 551 720[20][21]  Chili 500 000[22]  Rusland 394 138  Bolivië 375 000[23]  Verenigde Koninkryk 365 654[24][25]  Italië 314 604[26]  Paraguay 290 000[27]  Switserland 266 000[28][29][30]  Peru 240 000[31]  Nicaragua 200 000[32]  Kasakstan 178 409[33]  Oostenryk 170 475[34]  Pole 148 000[35]  Spanje 138 917[36]  Hongarye 131 951[37]  Costa Rica 100 000[38]  Israel 100 000[39]  België 73 000  Swede 48 987  Uruguay 46 000[40][41]  Roemenië 36 884[42]  Oekraïne 33 302  Ecuador 33 000[43]  Namibië 30 000[44]  Dominikaanse Republiek 26 792[45][46]  Noorweë 25 000[47]  Ierland 21 305[48][49]  Tsjeggië 18 772[50]  Griekeland 15 498[51]  Portugal 15 498  Denemarke 15 000[52][53]  Kuba 12 387  Belize 10 865[54]  Colombia 9 668[55]  Kirgisië 8 563  Guatemala 7 000–10 000[56]  Filippyne 6 400  Finland 5 447  Slowakye 5 000–10 000[57]  Letland 4 975  Ghana 3 900[58]  Serwië 3 900  Kroasië 2 965[59]  Turkmenistan 2 700[60]  Tadjikistan 2 700[60]  Litaue 2 418  Estland 1 544  Ysland 842  Jamaika 160[61]
Taal:	Duits: Hoogduits (Opperduits, Middelduits), Nederduits
Geloofsoortuiging:	Rooms-Katolieke Kerk, Protestantisme (hoofsaaklik Lutheranisme en Calvinisme; sien EKD),[62] ongebonde
Verwante etniese groepe:	Ander Germaanse volke; Baltiese Duitsers; Ruslandduitsers

Germania, nasionale personifikasie van Duitsland en die Duitsers. Skildery deur Philipp Veit in 1848

Verspreiding van die Duitse diaspora

Duitsers vorm die titulêre nasie van Duitsland, waar hulle byna 93% van dié land se bevolking vorm en nog klein erkende minderhede soos Dene, Friese, Roma en Sorbe leef. Behalwe Duitsland kom Duitse minderhede nog in Europese lande soos België (Duitstalige Gemeenskap), Denemarke (Noord-Sleeswyk), Frankryk (Elsas en Lotaringe), Italië (Suid-Tirool), Kasakstan, Nederland, Pole (Silesië), Rusland (Ruslandduitsers) en Tsjeggië (Sudete) voor.

Nie alle mense wat Duits as moedertaal praat, beskou hulself as Duitsers nie. Byvoorbeeld het die Duitstalige bevolking in Liechtenstein, Luxemburg, Oostenryk en Switserland oor die eeue heen hul eie nasionale selfidentifikasie ontwikkel en beskou hulself nie as Duitsers nie, maar as Oostenrykers, Switsers, ens.

Wêreldwyd is daar tussen 100 en 150 miljoen Duitsers, waarvan omtrent die helfde in Duitsland woonagtig is. Daarbenewens het sowat 'n miljoen Duitsers hul in Noord- en Suid-Amerikaanse lande soos Argentinië, Brasilië, Kanada, die Verenigde State en Australië gevestig. Die aantal hang af van die definisie van die term Duitsers en die mense se selfidentifikasie.

Tydens die tydperk van die Duitse Keiserryk het sommige Duitsers hulle in gebiede van die Duitse koloniale ryk gevestig, veral in Duits-Suidwes-Afrika, waar in die huidige Namibië nog sowat 30 000 mense van Duitse afkoms woon. In Suid-Afrika is omtrent 1,2 miljoen mense van Duitse afkoms, veral die Afrikaners wat naas Nederlandse ook van Duitse, Engelse en Hugenote afkomstig is.[14]