Duitse rex

Die Duitse rex is ’n katras met die kenmerkende krullerige rex-pels. Sy geaardheid is baie soos dié van ’n Corniese rex.

Duitse rex
Herkoms Oos-Duitsland
Ontstaan Mutasie
Soort lyf Gemiddeld
Pels Slegs donshare
Patroon Alle
Wetenskaplike naam
Felis catus (huiskat)
Portaal    Katte

Geskiedenis

’n Vroeë rex-tipe kat van Duitsland was Munk, ’n kat wat in 1930 of 1931 op ’n dorp naby Königsberg, Duitse Ryk (vandag Kaliningrad, Rusland), gebore is. Hy was die seun van ’n Angorakat en ’n Russiese bloukat. Hy het verskeie kleintjies op die dorp gehad voor hy in 1944 of 1945 dood is. Daar is egter nooit met hom geteel nie.

Die eerste Duiste rex-katte wat doelbewus geteel is, was twee katjies in ’n werpsel van vier in 1957 in Berlin-Buch. Die ma, Lämmchen (Lammetjie), het ook ander rex-katjies gehad en die meeste is gebruik om ander rasse soos die Corniese rex te verbeter. In 1968 het ’n Oos-Duitse telery die laaste drie van Lämmchen se kleintjies gekoop en die bloedlyn aangevul met Europese korthaarkatte en katte van gemengde rasse. Hoewel dit moontlik is, is dit nie seker of daar ’n verbintenis tussen Munk en Lämmchen was nie.

Nog ’n rex-kat, Schnurzel, is in die laat 1950's in Berlin-Buch gevind en is in die teelprogram gebruik.

Beskrywing

Duitse rex-katte is van gemiddelde grootte met slank bene. Die kop is rond en die ore groot. Die oë is ook van gemiddelde grootte en hang af van die kleur van die pels. Die pels is kort en sag en neig om krullerig te wees. Alle kleure, ook wit, word aanvaar.

Die katte is vriendelik, spelerig en intelligent en vorm maklik ’n band met mense. Hul geaardheid is baie soos dié van ’n Corniese rex.

Sien ook

Eksterne skakels
This article is issued from Wikipedia. The text is licensed under Creative Commons - Attribution - Sharealike. Additional terms may apply for the media files.