Drammen

Drammen (Noors: [dɾàmːən], ) is 'n stad en munisipaliteit (Noors: kommune) in die Noorse provinsie (fylke) Buskerud. Dit is die vyfde grootste stad in Noorweë na Oslo, Bergen, Trondheim en Stavanger met 'n oppervlakte van 137 vierkante kilometer en 'n bevolking van 104 487 (2023). Drammen is 41 kilometer suidwes van Oslo by die uitmonding van die Drammenselva-rivier in die Drammensfjord geleë. Die munisipaliteit grens in die noordooste aan die kommune Lier, in die suidooste aan Selvik, in die suide aan Sande en in die weste aan Hof en Nedre Eiker. Met 'n bevolking van 104 487 is Drammen die sentrum van die sesde grootste stedelike gebied in Noorweë, geleë in die land se digbevolkte ooste, en 'n belangrike nywerheidstad, uitvoerhawe en spoorwegterminus.

'n Uitsig oor Deammen, sy rivierhawe en die fjord

Drammen
Kaart	Wapen
	Vlag
Land	Noorweë
Provinsie (Fylke)	Buskerud
Koördinate	59°44′N 10°12′O
Stigting	1811
Oppervlakte:
- Totaal	137 vk km
Hoogte bo seevlak	1 m
Bevolking:
- Totaal (2023)	104 487
- Bevolkingsdigtheid	762,7/vk km
- Taalvorm	Onsydig
Tydsone	UTC +1 (MET)
- Somertyd	UTC +2 (MEST)
Klimaat (uk.weather.com)
- Tipe	Kontinentaal-gematig
- Gemiddelde jaarlikse temperatuur	6,6 °C
- Gem. temp. Januarie/Julie	–3,3 / 18,0 °C
- Gemiddelde jaarlikse neerslae	808,6 mm
Burgemeester	Kjell Arne Hermansen (H)
Amptelike webwerf	drammen.kommune.no

Die oorspronge van Drammen strek terug tot in die Middeleeue toe twee nedersettings in die gebied gevestig is, Bragernes en Strømsø. Gedurende die 15de eeu het hierdie streek danksy sy houtuitvoere reeds handelsbetrekkinge met Europese lande gehandhaaf, met Strømsø en Tangen as belangrike uitvoerhawens. In 1811 het die nedersettings saamgesmelt tot die nuwe munisipaliteit Drammen. Die houtbedryf met saagmeule het net soos die ligging langs die rivier en die toegang tot die Atlantiese Oseaan het bygedra tot Drammen se ekonomiese groei. 'n Tyd lank was Drammen die tuishawe van Noorweë se grootste vloot seilskepe wat hout na Engeland en vastelandse uitvoermarkte vervoer het.

In die tyd van die nywerheidsomwenteling het papiermeule, ysteraanlegte, glas- en tekstielfabrieke, skeepsbouwerwe en ander nywerhede ontstaan. Intussen het hierdie fabrieke, wat met water- en lugbesoedeling verbind is, plek gemaak vir nuwe aanlegte wat onder meer elektroniese, grafiese en voedselprodukte vervaardig. Drammen is daarnaas 'n modelstad vir inligtingstegnologiegebaseerde ekonomiese groei en moderne stadsbeplanning in 'n smart city.[1]